اقتاۋعا 3 مىڭعا جۋىق قوقيقاز ۇشىپ كەلدى
مامانداردىڭ ايتۋىنشا، اقتاۋعا قوقيقازدار اقمولا وبلىسىنداعى قورعالجىن مەملەكەتتىك تابيعي قورىعىنىڭ اۋماعىنداعى تەڭىز جانە قورعالجىن كولدەرىنەن ۇشىپ كەلگەن.
اۋا رايى سۋىتقان سوڭ وڭتۇستىككە، ياعني حازار قورىعىنا نەمەسە ودان دا ءارى يران جاققا ءوتىپ كەتەدى.
«جۇزدەگەن قوقيقاز قاراكولدە قىستاپ قالۋى مۇمكىن. قاراكولدەن باسقا ولار ءتۇپقاراعان اۋدانى توڭىرەگىندەگى تۇلەن ارالدارىندا بولادى، ول جەردە سۋ قاتقان جاعدايدا قاراكولگە كەلەدى. ءومىر سۇرۋگە قولايلى جاعدايعا بايلانىستى ەكى ورتادا اۋىسىپ وتىرادى» ، - دەيدى «تابيعي ورتا» باتىس قازاقستان ۇ ە ۇ وڭىرلىك قاۋىمداستىعى كەڭەسىنىڭ ءتوراعاسى ادىلبەك قوزىباقوۆ.
ادىلبەك قوزىباقوۆتىڭ ايتۋىنشا، قاراكول اۋماعى - « قىزىل كىتاپقا» ەنگەن قاناتتىلار تۇراقتايتىن مەكەن. سوندىقتان دا بۇل جەر تابيعات قورعاۋ ينسپەكتورلارىنىڭ ءجىتى باقىلاۋىندا.
ايتا كەتەيىك، قىزعىلت تۇستەس، ءىرى دەنەلى قۇستار، نەگىزىنەن تروپيكالىق ەلدەردە ۇيا سالادى.
