بيىل ءبىرىنشى توقساندا بيۋجەت كىرىسى 3 تريلليون تەڭگەگە جۋىقتادى
بۇل تۋرالى Finprom.kz ساراپشىلارى ءمالىم ەتتى، دەپ حابارلايدى قازاقپارات.
ايتا كەتەيىك، 2018-جىلدىڭ وسى كەزەڭىندە مەملەكەتتىك بيۋجەتتىڭ تابىسى 2,7 تريلليون تەڭگەنى قۇرادى.
«مەملەكەتتىك بيۋجەت كىرىستەرى قۇرىلىمىندا ونىڭ نەگىزگى ۇلەسىن سالىق تۇسىمدەرى قامتىپ، 70,6 پايىز بولدى. ءبىر جىل بۇرىن سالىقتىڭ ۇلەسى 67,3 پايىز دەڭگەيىندە قالىپتاسقان ەدى. ەكىنشى ورىن ترانسفەرتتەر تۇسىمىنە تيەسىلى، ياعني 790 ميلليارد تەڭگە نەمەسە كىرىستەردىڭ جالپى سوماسىنان 27 پايىزى. بۇل باعىتتا ءبىر جىل ىشىندە 0,6 پايىز كولەمىندە ءبىرشاما تومەندەۋ بايقالدى. سالىقتىق ەمەس كىرىستەر جانە نەگىزگى كاپيتالدى ساتۋدان بولعان تابىستار سايكەسىنشە 46,5 ميلليارد جانە 23,7 ميلليارد تەڭگەنى قۇرادى. ولاردىڭ جيىنتىق ۇلەسى 2,4 پايىز بولدى»، - دەدى ساراپشىلار.
بيىلعى ءۇش ايدا مەملەكەتتىك بيۋجەتكە سالىقتىق تۇسىمدەر 2,1 تريلليون تەڭگەنى قۇراپ، وتكەن جىلعى ءتيىستى كەزەڭنەن (1,8 تريلليون تەڭگە) 15,7 پايىزعا ارتىق بولدى.
ەستەرىڭىزگە سالا كەتەيىك، بيىل ءساۋىر ايىندا قازاقستان پرەزيدەنتى قاسىم-جومارت توقايەۆ پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆتى قابىلدادى.
قاسىم-جومارت توقايەۆ بيۋجەتتىك شىعىنداردى وڭتايلاندىرۋ جانە مەملەكەتتىك بيۋجەتكە ءتۇسىمدى كوبەيتۋ قاجەتتىگىن ايتتى. سونداي-اق، پرەزيدەنت كەدەندىك جانە سالىقتىق اكىمشىلىكتىڭ تيىمدىلىگىن ارتتىرۋدى تاپسىردى.