قازاقستان پرەزيدەنتى جىلىنا 3 مىڭ توننا ەت وڭدەيتىن كەشەندى ىسكە قوستى
«قۇرمەتتى ەلباسى! ءبىزدىڭ ۇن شىعاراتىن ديىرمەن كەشەنى اۋىل شارۋاشىلىعى سالاسىن قولداۋ جانە «سيفرلىق قازاقستان» ەكى بىردەي مەملەكەتتىك باعدارلامانىڭ جەمىسى. بۇل ءىرى كەشەندى پلانشەتتەن باسقارۋعا بولادى. تسيفرلىق تەحنولوگيالارسىز دامىعان 30 ەلدىڭ قاتارىنا كىرۋ مۇمكىن ەمەس. ءبىز، اۋىل شارۋاشىلىعى ماماندارى، جاھاندىق باسەكەگە قابىلەتتىلىكتىڭ ماڭىزدىلىعىن جاقسى تۇسىنەمىز» ، - دەدى «كارات» ج ش س اتقارۋشى ديرەكتورى راشيد وتاروۆ.
ال «ايتاس KZ» ا ق باس ديرەكتورى سەرىك تولىقپايەۆ ق ر پرەزيدەنتىنەن ماكينسك قۇس فابريكاسىنىڭ ءبىرىنشى كەزەڭىن ىسكە قوسۋدى سۇرادى.
«قادىرلى نۇرسۇلتان ءابىش ۇلى! جۇمىس ساپارىمەن ءبىزدىڭ زاۋىتىمىزعا كەلگەنىڭىزدە قۋاتتىلىعى 50 مىڭ توننا بولاتىن ەلىمىزدە عانا ەمەس، تۇگەل ورتالىق ازياداعى ەڭ ءىرى قۇس فابريكاسىن سالۋعا تاپسىرما بەرگەن ەدىڭىز. تاپسىرماڭىزدى بۇلجىتپاي ورىندادىق. بۇگىن ەلىمىزدەگى قۇس ەتىنىڭ يمپورتىن 30 پايىزعا ازايتىپ، ەكسپورتتى ۇلعايتاتىن جاڭا قۇس فابريكاسىنىڭ ءبىرىنشى كەزەگىن ىسكە قوسۋعا دايىنبىز. بۇل جوبا - استانا ازىق- تۇلىك بەلدەۋىنىڭ ءبىر بولىگى» ، - دەدى ول.
«تورعاي ەت» ج ش س ديرەكتورى راسۋل مۇكانوۆ بولسا، تاۋەلسىز قازاقستان تاريحىندا تۇڭعىش رەت مەملەكەت قولداۋىمەن تورعاي وڭىرىندە ەت وڭدەۋ كەشەنىن تۇرعىزعاندىقتارىن ايتتى.
«كاسىپورىن جىلىنا 3 مىڭ توننا ەت وڭدەۋگە دايىن. الداعى ۋاقىتتا قۋاتى جىلىنا 5 مىڭ باس بولاتىن مال بورداقىلاۋ الاڭىن سالامىز. وسىلايشا، اقمولا، قاراعاندى، قوستاناي وبلىستارىنىڭ ءوڭىرارالىق كووپەراتسياسى اياسىندا ەت كلاستەرىن دامىتاتىن بولامىز. قۇرمەتتى پرەزيدەنت، اۋىل شارۋاشىلىعى ماماندارىنىڭ ەڭبەگىن كەزەكتى رەت قولداپ، وسى سالاداعى 3 جاڭا جوبانى ىسكە قوسۋعا رۇقسات ەتىڭىز!» ، - دەدى راسۋل مۇقانوۆ.
نۇرسۇلتان نازاربايەۆ قازاقستان ءۇشىن اۋىل شاۋراشىلىعى ەڭ ۇلكەن سالانىڭ ءبىرى ەكەندىگىن باسا ايتىپ، ءۇش جوبانى دا ىسكە قوستى.
«قازاقستان ءۇشىن اۋىل شارۋاشىلىعى ەڭ ۇلكەن سالانىڭ ءبىرى. بولاشاقتا ۇلكەن ءونىم كۇتەتىن ءوندىرىسىمىز. قازاقستاننىڭ جەرى دە كەڭ، مۇمكىنشىلىگىمىز دە بار. تەك قانا كەن بايلىعى ەمەس، جەر بايلىعى بار. ەگەر ءبىز وسى ءوندىرىستى ۇلعايتاتىن بولساق، ەكسپورتتىق الەۋەتىمىز كۇشەيەدى. قازاقستانعا كەلەتىن قاراجات كوبەيەدى، ەلدىڭ بايلىعىنا جۇمىس ىستەيتىن بولادى. سوندىقتان بۇل ءۇش ءوندىرىستىڭ بارلىعى دا قاجەت. اسىرەسە، قازىر جاعدايى قيىن بولىپ تۇرعان تورعاي وڭىرىندە ىسكە قوسىلعان كاسىپورىن ءبىراز ادامعا جۇمىس بەرىپ، قۋانتقان شىعار دەپ ويلايمىن. ەت تە، ءسۇت تە، وڭدەۋ دە قاجەت. وتە جاقسى جۇمىس ىستەدىڭىزدەر، راحمەتىمدى ايتامىن» ، - دەدى ەلباسى.