جاس وسپىرىمدەر وليمپياداسى: 3 قازاقستاندىق بوكسشى فينالعا شىقتى

استانا. قازاقپارات - بۋەنوس-ايرەستە ءوتىپ جاتقان جاس وسپىرىمدەر وليمپياداسىندا ءۇش قازاقستاندىق بوكسشى فينالعا شىقتى، دەپ حابارلايدى قازاقپارات.

ق ر ۇلتتىق وليمپيادالىق كوميتەتىنىڭ باسپا ءسوز قىزمەتىنەن بەلگىلى بولعانداي، اسا اۋىر سالماقتاعى دامير تويباي (+91)، تالعات شايكەن (64) جانە ايبەك ورالباي (91 كەلى) جارتىلاي فينالداعى قارسىلاستارىنان باسىم ءتۇسىپ، وليمپيادا ويىندارىنىڭ فينالىنا شىقتى.

جارتىلاي فينالدا ورالباي تورەشىلەردىڭ ءبىراۋىزدان شىعارعان شەشىمىمەن پۋەرتو-ريكولىق بوكسشى الۆين كانالەستى جارىس جولىنان تايدىرسا، اسا اۋىر سالماقتا جۇدىرىقتاساتىن دامير تويباي دا قارسىلاسىنان باسىم ءتۇسىپ فينالعا جولداما الدى. ال تالعات شايكەن قارسىلاسىن نوكاۋتقا ءتۇسىرىپ، جەڭىس جولىن جالعاستىرۋعا مۇمكىندىك الدى.

سونداي-اق، 75 كەلىگە دەيىن جۇدىرىقتاساتىن نادەجدا ريابەتس قولا جۇلدە ءۇشىن كۇش سىنايتىن بولادى.

بۇعان دەيىن حابارلاعانىمىزباي، 91 كەلىدەن جوعارى سالماق دارەجەسىندەگى دامير تويباي ساموالىق قارسىلاسى تولاۋا تۋيگومالانىڭ جاراقاتىنا بايلانىستى جارتىلاي فينالعا جولدامانى رينگكە شىقپاستان الدى. ال قىزدار اراسىنداعى ايقاستا وتانداسىمىز جانسايا ءابدىرايىموۆا (48-51 كەلى) امەريكالىق دەستيني حيۆەن گارسياعا تورەشىلەر شەشىمىمەن 2:3 ەسەبىمەن جول بەرىپ قويدى.

بۇعان دەيىن 75 كەلىگە دەيىنگى سالماقتا سىنعا تۇسكەن نادەجدا ريابەتس شيرەك فينالدا پولشالىق ناتاليا گاجيەۆسكايانى 5:0 ەسەبىمەن جەڭىپ، جارتىلاي فينالعا وتكەن بولاتىن.

بۋەنوس-ايرەس استاناسى ارگەنتينادا 3-جازعى جاس وسپىرىمدەر وليمپياداسى 6-18- قازان ارالىعىندا وتەدى. وعان 206 مەملەكەتتەن 4 مىڭ سپورتشى قاتىسۋدا. جارىستار باعدارلاماسىنا سپورتتىڭ ءداستۇرلى 28 تۇرىنەن بولەك، سپورتتىق بيلەر (برەيك-دانس)، كاراتە، تاۋعا ورمەلەۋ، روليكپەن سىرعاناۋ قوسىلىپ وتىر.

بايراقتى دودادا ەل نامىسىن 58 سپورتشى قورعاۋدا.

اۆتور: كۇنسۇلتان وتارباي