قازاقستاننىڭ 3 قالاسىنان باياناۋىلعا اۋە رەيستەرى اشىلادى
«مەملەكەت باسشىسىنىڭ تاپسىرماسىنا سايكەس ق ر ي د م ازاماتتىق اۆياتسيا كوميتەتى ەلىمىزدىڭ جەرگىلىكتى اۋە جەلىلەرىن دامىتۋ بويىنشا جۇمىستاردى جۇرگىزىپ جاتىر. وسىعان وراي، سونداي-اق تۋريزمدى دامىتۋ جانە پاۆلودار وبلىسىنىڭ باياناۋىل اۋدانىنداعى كۋرورتتىق ايماقتىڭ قولجەتىمدىلىگىن ارتتىرۋ ماقساتىندا ۇزىندىعى 1200 م جانە ەنى 21 م ۇشىپ-قونۋ الاڭى جاڭارتىلۋدا. جەرگىلىكتى اەرودروم بارلىق قاجەتتى اەروناۆيگاتسيالىق جابدىقتارمەن جابدىقتالماق. سونداي-اق، جولاۋشىلارعا قىزمەت كورسەتۋ ءۇشىن 200 شارشى مەتر اۋماقتى قۇرايتىن عيمارات سالىنادى»، - دەلىنگەن مينيسترىك تاراتقان حابارلامادا.
باسپا ءسوز قىزمەتىنىڭ حابارلاۋىنشا، كۋرورتتىق ايماقتاعى اەرودرومدى 2018-جىلدىڭ سوڭىنا دەيىن سالىپ ءبىتىرۋ جوسپارلانعان. ءتيىستى سەرتيفيكاتتاۋدان كەيىن، كەلەسى تۋريستىك ماۋسىم الدىندا استانا-باياناۋىل، پاۆلودار-باياناۋىل رەيستەرىن اشۋ كوزدەلىنىپ وتىر. سونىمەن قاتار، الماتى-باياناۋىل باعىتىن اشۋ بويىنشا جۇمىستار جۇرگىزىلۋدە. اتالعان باعىتتاردا ايماقتىق اۆياتسيانىڭ ۇشاقتارىن پايدالانۋ جوسپارلانىپ وتىر.
بيىلعى تۋريستىك ماۋسىمدا استانا مەن الماتىدان بالقاش، ءۇشارال جانە ءۇرجار كۋرورتتىق ايماقتارىنا سۋبسيديالانعان تۇراقتى ىشكى رەيستەر ورىندالاتىندىعىن اتاپ وتكەن ءجون.