+7 (701) 759 90 19 Лента
20 °С : استانا
21 °С : الماتى
USD 340.27 EUR 396.31
RUB 5.39 CNY 52.39
جاڭالىقتار

ءومىرقۇل اينيازوۆ: كونسەرۆاتوريانى 3 مىڭ تەڭگەلىك دومبىرامەن بىتىرگەنمىن

14 ماۋسىم 16:04 524
:ءبولىسۋ
ءومىرقۇل اينيازوۆ: كونسەرۆاتوريانى 3 مىڭ تەڭگەلىك دومبىرامەن بىتىرگەنمىن

الماتى. قازاقپارات - تانىمال ءانشى ءومىرقۇل اينيازوۆ كونسەرۆاتوريادا وقىپ جۇرگەن كەزىندەگى دومبىراسىن كوك بازاردان 3 مىڭ تەڭگەگە ساتىپ العان ەكەن.

بۇل تۋرالى ءانشىنىڭ ءوزى قازاقپارات تىلشىسىنە اڭگىمەلەپ بەردى.

كىشكەنتاي كەزىنەن قولىنا دومبىرا العان ءانشى ەڭ العاش نۇرتۋعان جىراۋدىڭ «قانەكەي، ءتىلىم سويلەشى» تەرمەسىن بىلدىرلاپ ايتا باستاعان ەكەن. ءانشى جاسىنان دومبىرانى دىڭعىرلاتىپ وسكەندىگىن ەسىنە الدى.

«مەن اتا-اجەمنىڭ قولىندا ءوستىم. سول شاڭىراقتا وتەپبەرگەن دەگەن اعام جىر-تەرمەنى جاقسى بىلەتىن. كىشكەنتاي كەزىمدە سول كىسى مەنى تىزەسىنە قويىپ ولەڭ ايتاتىن. ءبىرىنشى سىنىپقا بارعاندا ەڭ العاش نۇرتۋعاننىڭ تەرمەسى «قانەكەي، ءتىلىم سويلەشىنى» تارتتىم. بالا كەزىمدە جاتتاعان بازار جىراۋ، تۇرماعامبەتتىڭ تەرمەلەرى ءالى كۇنگە دەيىن سانامنان وشكەن ەمەس»، - دەدى ءومىرقۇل اينيازوۆ.

 
ءومىرقۇل اينيازوۆ: كونسەرۆاتوريانى 3 مىڭ تەڭگەلىك دومبىرامەن بىتىرگەنمىن

بالانىڭ ونەرگە بەيىمدىگىن بايقاعان اتا-اناسى جەتكىنشەكتى مۋزىكا مەكتەبىنە قوسىمشا ساباققا بەرەدى.

«مۋزىكا مەكتەبىنە 4 سىنىپتان باستاپ قاتىستىم. ول جەردە مەن بايان سىنىبىندا وقىدىم. قوسىمشا تەرمەگە ماشىقتاندىم. كەيىن مۋزىكا كوللەدجىنە كۇي بولىمىنە ءتۇستىم. ءارى قاراي ءبىلىمىمدى ءداستۇرلى انمەن جالعاستىردىم»، - دەدى ءانشى.

بولاشاق ءانشى مۋزىكا كوللەدجىندە وقىپ جۇرگەندە جاتاقحانادا دومبىراسىن ۇرلاتىپ الىپ، كونسەرۆاتورياعا اسپاپسىز كەلەدى.

«ول كەزدە اقشانىڭ تاپشى كەزى. ارنايى تاپسىرىسپەن دومبىرا جاساتۋعا جاعداي جەتپەيدى. سودان كوك بازاردان بارىپ 3 مىڭ تەڭگەگە دومبىرا ساتىپ الدىم. سول دومبىراممەن كونسەرۆاتوريانى ءتامامدادىم. باعاسى ارزان بولسا دا ، قادىرى بولەك قارا دومبىرامدى كوزىمنىڭ قاراشىعىنداي ەتىپ ساقتاپ ءجۇرمىن. شىعارماشىلىققا كەلگەننەن كەيىن ارنايى تاپسىرىسپەن ەكى دومبىرا جاساتتىم. قازىر وسى ءۇش دومبىرامەن ونەر كورسەتىپ ءجۇرمىن»، - دەدى ول.

 
ءومىرقۇل اينيازوۆ: كونسەرۆاتوريانى 3 مىڭ تەڭگەلىك دومبىرامەن بىتىرگەنمىن

ءوز بالاسىنا كىشكەنتايىنان دومبىرا ۇيرەتكەن ءانشىنى بۇگىنگى جاستاردىڭ قولىنا دومبىرا ۇستاي المايتىنى قىنجىلتادى.

«بالامدى كىشكەنتايىنان دومبىراعا بەردىم. بۇگىندە ءان ايتىپ جۇرگەن جاستاردىڭ ىشىندە قولىنا دومبىرا ۇستاي بىلمەيتىندەرى بار. قازاقتىڭ بالاسى بولعاننان كەيىن، ونىڭ ۇستىنە ءان ايتىپ جۇرگەن سوڭ ۇستەل باسىندا ءبىر-ەكى شىعارما شەرتۋگە جاراعانى جاقسى عوي...» - دەپ اڭگىمەسىن اياقتادى ءانشى.

  

ارايلىم جولداسباي


باستى سوزدەر: مادةنيةت, قوعام,
:ءبولىسۋ
ونلاين قىزمەتكەرلەر
مۇراعات