بۇكىل الەمدىك جۇگىرۋگە قاتىسۋشىلار قايىرىمدىلىققا 3 ميلليون ەۋرو جينادى

باكۋ. قازاقپارات - بيىلعى جىلى Wings for Life World Run قايىرىمدىلىق ماقساتىنداعى جۇگىرۋگە ازەربايجاندى قوسقاندا 66 ەلدەن 100 مىڭ ادام قاتىستى. ەنتۋزياستەر جيناعان بارلىق جارنا جۇلىن جاراقاتىن زەرتتەۋگە، ونى ەمدەۋ جولدارىن ىزدەۋگە جۇمسالادى.

ازەرتادج اگەنتتىگىنىڭ حابارلاۋىنشا، باكۋدە وتكەن باسەكەدە 28,35 شاقىرىمعا جۇگىرگەن اننا يۋسۋپوۆا جەڭىمپاز اتانعان.

ال ەرلەر اراسىندا 25 شاقىرىمدى ەركىن باعىندىرعان سۋلەيمان الييەۆتىڭ مەرەيى ۇستەم بولدى.

ايتا كەتەر جايت، جۇگىرۋگە نيەت قىلعانداردىڭ ءبارى، مۇگەدەكتەر ارباسىنا تاڭىلعان جاندار قاتىسادى.

ول بۇكىل الەمدە ءبىر ۋاقىتتا جانە اۋا رايىنا قاراماي باستالادى. سپورتشىلار مارەدەن شىققان ساتتەن جارتى ساعاتتان سوڭ ولاردىڭ ارتىنان اۆتوموبيل جۇرەدى. الدىمەن ول ساعاتىنا 15 شاقىرىمدىق جىلدامدىقپەن جۇرەدى، سودان كەيىن ۇلعايتا باستايدى.

قاتىسۋشىلار اۆتوموبيل قۋىپ جەتكەندە جارىستان شىعۋلارى ءتيىس.

ال مۇگەدەك ارباسىمەن بارىنەن ۇزاققا جۇگىرگەن ادام جەڭىمپاز اتانادى.

الەم بويىنشا جۇگىرۋدە ايەلدەر اراسىندا پورتۋگاليالىق سپورتشى ۆەرا نۋنەش ۇزدىك كورسەتكىشكە قول جەتكىزدى. ول گەرمانيادا 54 شاقىرىم قاشىقتىقتى باعىندىردى.

ال ەرلەر اراسىندا مۇگەدەك ارباسىنداعى شۆەدتىك ارون اندەرسوننان وزان جان بولمادى.

ول ا ق ش- تاعى جۇگىرۋگە قاتىسىپ، 90 شاقىرىمدى ارتقا تاستاعان. ايتا كەتەرى، اندەرسون ەكىنشى جىل قاتارىنان جەڭىمپاز اتانىپ وتىر.

جالپى العاندا قاتىسۋشىلار 900 مىڭ شاقىرىمنان استام قاشىقتىققا جۇگىرگەن.

جارىستىڭ ارقاسىندا 3 ميلليون ەۋرو جينالدى. بۇل شارا وسىمەن بەسىنشى رەت ۇيىمداستىرىلىپ وتىر.