جاۋىنگەرلىك پاراد: قازاقتىڭ رۋحىن وياتقان ءاندى 3 مىڭ سارباز ورىندايدى
بۇعان دەيىن حابارلاعانىمىزداي، وتان قورعاۋشى كۇنىنە ارنالعان قازاقستان قارۋلى كۇشتەرىنىڭ جاۋىنگەرلىك پارادى وتار ەلدى مەكەنىنىڭ ماڭىندا ورنالاسقان 40-اسكەري بازا اۋماعىندا وتەدى. قازىرگى ۋاقىتتا 3 مىڭنان استام سارباز پارادقا ءجىتى دايىندىق ۇستىندە.
ەسكە سالساق، وتارداعى پوليگوندا ساپ تۇزەگەن اسكەريلەردىڭ «مەن قازاقپىن» ءانىن ورىنداپ جاتقانى تۋرالى ۆيدەو الەۋمەتتىك جەلىدە تاراپ، حالىقتىڭ سۇيىسپەنشىلىگىنە بولەنگەن بولاتىن.
ايتا كەتەرلىگى، ەل ىشىندە سوڭعى 5-6 اي شەڭبەرىندە عانا كەڭىنەن شىرقالا باستاعان «مەن قازاقپىن» ءانىن تالانتتى جاس ءانشى قۋاندىق راحىم ەسترادالىق جانردا ورىنداپ ءجۇر. ءسوزىن اقىن نۇرجان ءومىرباي، ال ءانىن جاراسحان تولەباي ەسىمدى جاس كومپوزيتور جازعان.
ءان اۆتورى جاراسقان تولەبايدىڭ ايتۋىنشا، «مەن قازاقپىن» ءانى كەيىنگى بۋىن وكىلدەرىنىڭ شەتەل مۋزىكاسىنا ەلىكتەۋى ءورشىپ بارا جاتقان ۋاقىتتا، ەلدىڭ رۋحىن وياتاتىن قازاق ءانى جات ەلدىڭ داڭعازاسىنا تويتارىس بولسىن دەگەن ماقساتتا تۋىنداعان.
«قازاقستان اسكەرى - ەلىمىزدىڭ تىرەگى. ءبىر مەملەكەتتىڭ اسكەرى ساپتا تۇرىپ، «مەن قازاقپىن» ءانىن شىرقاپ تۇرسا، ارينە بۇل مەن ءۇشىن زور قۋانىش، ۇلكەن جەتىستىك»، - دەدى ول.
ال ءان ءسوزىنىڭ اۆتورى نۇرجان ءومىرباي «مەن قازاقپىن» ءانى ەلگە دەگەن ماحابباتتان تۋىنداعانىن اتاپ وتكەن.
«مەن قازاقپىن» ولەڭى، ەڭ الدىمەن، ەلگە دەگەن ماحابباتتان تۋعان دۇنيە. ونسىز دا «مەن قازاقپىن» دەگەن ولەڭ كوپ قوي. سونىڭ ىشىندە شوقتىعى بيىگى - جۇبان مولداعاليەۆتىڭ «مەن قازاقپىن مىڭ ءولىپ، مىڭ تىرىلگەن» دەپ باستالاتىن ولەڭى. مەنىڭ ولەڭىم دە اتامىزدىڭ وسى ولەڭىنىڭ شەكپەنىنەن شىققان. ءبىراق مەن بۇل جولى «قازاق بولىپ تۋماعاندا، نە ەتەر ەم» دەپ كەرىسىنشە قاراپ كوردىم. ەگەر ءبىز قازاق بولىپ تۋماساق، ءبىراز يگىلىكتەن، ءبىرشاما قۇندىلىقتان ايىرىلىپ قالادى ەكەنبىز. تولعاعى جەتىلىپ تۇرعان دۇنيە بولعاندىقتان، ولەڭنىڭ ءماتىنى وڭاي جازىلدى. قازىر الەۋمەتتىك جەلىنى اشىپ قالساق، ءبىر قازاق ءسۇرىنىپ، قۇلاي كەتسە، ونى الاۋلاتىپ- جالاۋلاتىپ جان- جاعىنان جەگىدەي جەپ، شي بورىشە تالاپ، جەتەر جەرىنە جەتكەنشە اتويلاپ، جان- جاققا جار سالامىز. ال بىرەۋ جەڭىسكە، جەتىستىككە جەتىپ جاتسا، ونىڭ جارناماسى ءدال وسىنداي بولا قويمايدى. بولعان جاعدايدىڭ وزىندە دە، ودان دا ءبىر سىن تاۋىپ، ءمىن تاۋىپ، ءسۇرىندىرىپ جىبەرۋگە ۇمتىلىپ تۇرامىز. بۇل شىعارمام الەۋمەتتىك جەلىدەگى كوڭىلگە قاياۋ سالاتىن كەيبىر كەلەڭسىزدىكتەرگە قارسى كۇرەس رەتىندە تۋعان ولەڭ بولاتىن»، - دەدى نۇرجان ءومىرباي.
«مەن قازاقپىن» ءانىنىڭ ورىنداۋشىسى قۋاندىق راحىم بۇل ءاندى اسكەريلەردىڭ ورىنداعانىن الەۋمەتتىك جەلىدەن كورىپ، بويىن قۋانىش كەرنەگەندىگىن ايتادى.
«ەڭ العاش الەۋمەتتىك جەلىدەن كوردىم. ەستىگەن كەزدە، ارينە، ەرەكشە ءبىر سەزىمگە بولەنىپ، بويىمدى ۇلكەن ءبىر قۋانىش بيلەگەنى راس. ءانشى ءۇشىن ءار ءان ءوز بالاسىنداي. ءان حالىقتىڭ كوڭىلىنەن شىعىپ، ءوز ورنىن تاۋىپ جاتسا، ودان ارتىق باقىت بار ما؟ «مەن قازاقپىن» ءانىنىڭ حالىقتىڭ پايداسىنا جاراعانىنا قۋانىشتىمىن»، - دەدى ءانشى.
ايتا كەتەيىك، وتارداعى 40-اسكەري بازا اۋماعىندا وتەتىن جاۋىنگەرلىك پاراد تىكەلەي ەفيردە كورسەتىلەتىندىگى جوسپارلانعان. «ءماتىبۇلاق» پوليگونىنداعى شاراعا 3 مىڭنان استام سارباز، 300-دەن استام اسكەري تەحنيكا، 30-عا جۋىق اۆياتسيا تەحنيكاسى قاتىسادى. ارميالىق بولىمشەلەر اسكەري تەحنيكانىڭ زاماناۋي ۇلگىلەرىن ءىس جۇزىندە قولدانۋ تاسىلدەرىن كورسەتەدى دەپ كۇتىلۋدە. سوڭعى رەت جاۋىنگەرلىك پاراد 2013 -جىلى وتكەن بولاتىن.
بۇعان دەيىن ق ر قورعانىس مينيسترلىگىنىڭ باسپا ءسوز قىزمەتى قازاقستاننىڭ قارۋلى كۇشتەرىندە اسكەري پارادقا دايىندىق باستالىپ كەتكەنىن حابارلاعان ەدى.
اۆتور: مارلان جيەمباي