قىتايداعى قانداستارىمىزعا ۆيزا 3 جىلعا بەرىلەتىن بولادى
«ۆيزا ماسەلەسىنە توقتالار بولسام، جىل باسىندا كوشى- قون زاڭىنا وزگەرىستەر ەنگىزىلگەن كەزدە بۇل ماسەلە كوتەرىلدى. ءيا، بىزدە قيىنشىلىقتار بار. ءۇرىمجى قالاسىندا دا قيىنشىلىقتار ورىن الۋدا. سەبەبى، ونداعى كونسۋلدىققا ۆيزا اشتىرۋ ءۇشىن كۇنىنە 300 دەي ادام كەلەدى. ۆيزا اشتىراتىنداردىڭ 95 پايىزى - قازاقتار. بۇگىنگى تاڭدا قازاقستان تارابىنان ۆيزا ەشقانداي شاقىرۋسىز جانە كونسۋلدىق الىمسىز تەگىن 1 جىلعا بەرىلەدى. قازاقستانعا كەلگەندە دە ەشقانداي شەكتەۋ بولمايدى. 1 جىلدىق ۆيزاسى بار ادام قالاعانىنشا ءجۇرىپ- تۇرا الادى»، - دەدى ول.
ونىڭ ايتۋىنشا، ۇرىمجىدەگى كونسۋلدىق كۇندەلىكتى كەلەتىن ادامدارعا تولىق قىزمەت كورسەتۋگە شاماسى جەتىسپەيدى. ال ولاردىڭ شتاتىن ۇلعايتۋ ءۇشىن قىتاي تارابىمەن ارنايى كەلىسىمگە كەلۋ قاجەت. ويتكەنى، قىتاي تارابىنىڭ ەلىمىزدەگى ەلشىلىگىندە قانشا قىزمەتكەر بولسا، ءبىزدىڭ ەلدىڭ دە سول جاقتاعى ديپلوماتيالىق وكىلدىگىندە سونشا قىزمەتكەرى بولۋى ءتيىس.
«ەندى ۇرىمجىدەگى كەزەكتى ازايتۋ ءۇشىن ءبىز جاڭا ەرەجە قابىلداعالى وتىرمىز. جىلدىڭ ورتاسىندا قابىلدايىق دەپ ەدىك، ءبىر زاڭداعى وزگەرىستەرگە بايلانىستى جىل سوڭىنا قالىپ وتىر. جاڭا ەرەجەگە سايكەس ءبىرىنشى رەت قازاقستانعا كەلەمىن دەگەن ورالماندارعا نەمەسە قازاق دياسپوراسىنا 1 جىلدىق، ال ەكىنشى رەت كەلەتىن بولسا 3 جىلعا ۆيزا بەرىلەدى. ءۇش جىلعا بەرىلەتىن ۆيزا ۇرىمجىدەگى كەزەكتى ازايتادى دەپ ويلايمىز»، - دەدى ك. قوجامبەرديەۆ.
سونىمەن قاتار ول قازاقستانعا ءبىلىم الۋعا كەلگەن جاستاردىڭ 1 جىلدىق ۆيزا مەرزىمى اياقتالسا، قىتايعا بارماستان وسى جەردەن- اق ۇزارتۋعا بولاتىندىعىن ەسكەرتتى.