بريتانيادا جۇك كولىگىنەن دەنەسى تابىلعان 39 ادامنىڭ اتى- ءجونى بەلگىلى بولدى

نۇر- سۇلتان. قازاقپارات - بريتانيا پوليتسياسى ەسسەكس گرافتىعىندا جۇك كولىگىنەن دەنەلەرى تابىلعان 39 ۆەتنام ازاماتىنىڭ اتى- جوندەرىن انىقتادى.

 ولاردىڭ ءتىزىمى اشىق دەرەككوزدەردە جاريالانعان جوق، دەگەنمەن ازاماتتاردىڭ تۋىستارىنا حابار بەرىلدى، دەپ جازادى The New York Times.

باسىلىمنىڭ جازۋىنشا، پوليتسيانىڭ رەسمي ءتىزىمى شىقپاستان بۇرىن 8 ايەل، 31 ەر ادامنىڭ تۋىستارى ولاردىڭ سول جۇك كولىگىندە بولعان دەپ ساناپ، جوعالعان ازاماتتاردى جوقتاپ جۇرگەن.

بەيسەنبى كۇنى ۆەتنامنىڭ لوندونداعى ەلشىلىگى قازا تاپقان ازاماتتاردىڭ وتباسىنا كوڭىل ايتقان ەدى.

ەسسەكس پوليتسياسى 39 ادامنىڭ ءولىمىن تەرگەۋ جۇمىستارى تۋرالى اقپارات جاقىندا جاريالاناتىنىن حابارلادى. سونىمەن قاتار ولار بريتانيا مەن ۆەتنام بيلىگى بۇل جۇمىستاردى بىرلەسىپ اتقارىپ جاتقانىن ايتتى.

ايتا كەتەيىك، دۇيسەنبى كۇنى پوليتسيا بۇل ىسكە قاتىسى بار دەگەن كۇدىكپەن 8 ادامدى قاماۋعا العان ەدى.

اۆتور: ايكۇمىس بولاتبەك