جۇك كولىگىنەن 39 ادامنىڭ دەنەسى تابىلدى

نۇر- سۇلتان. قازاقپارات - جۇك كولىگى سەنبى كۇنى بولگاريادان شىققان بولۋى مۇمكىن. جۇرگىزۋشى ۇستالدى.

ۇلى بريتانيالىق پوليتسەيلەر ەسسەكس گرافتىعىندا جۇك كولىگىنەن 39 ادامنىڭ دەنەسىن تاپتى. بۇل تۋرالى بۇگىن The Daily Telegraph گازەتى جازدى.

باسىلىمنىڭ حابارلاۋىنشا، سولتۇستىك يرلانديا ازاماتى بولىپ شىققان 25 جاستاعى جۇرگىزۋشى ۇستالعان.

ال، جۇك كولىگى بولگاريادا تىركەلگەن جانە سەنبى كۇنى حوليحەد ارقىلى ۇلى بريتانياعا كىرگەن.

حوليحەد ۇلى بريتانيادا دۋۆردان كەيىنگى ەڭ ۇلكەن پاروم پورتى جانە يرلانديادان ماتەريكتىك ۇلى بريتانياعا اكەلەتىن نەگىزگى مارشرۋت بولىپ ەسەپتەلەدى.

«جۇك كولىگىنىڭ جۇرگىزۋشىسىن قاماۋعا الدىق. قازىر تەرگەۋ ءجۇرىپ جاتىر»، - دەدى باس سۋپەرينتەندانت ەندريۋ مارينەر.

كولىكتە 38 ەرەسەك ادام جانە ءبىر ءجاسوسپىرىمنىڭ دەنەسى بولعان.