الاكولدىڭ تازالىعىنا قوسىمشا 390 ميلليون تەڭگە ءبولىندى
بۇل اقشاعا «الاكول- تازالىق» كوممۋنالدىق شارۋاشىلىعى كۇل- قوقىس جينايتىن زاماناۋي تەحنيكا الماق، دەيدى قازاقپارات ءتىلشىسى.
الاكول اۋدانى باسشىلارىنىڭ مالىمەتىنشە، ءقازىردىڭ وزىندە كولگە كەلگەن دەمالۋشىلار سانى 1 ميلليوننان اسقان. ال شيپالى كول جاعاسىنان تاۋلىگىنە 8-10 توننا قوقىس شىعارىلادى. «الاكول- تازالىق» كوممۋنالدىق مەكەمەسىنىڭ قىزمەتكەرلەرى اقشي اۋىلىندا 12 شاقىرىم، كوكتۇما اۋىلىندا 3 شاقىرىم جاعاجايدى كۇنىنە ءۇش رەت ءجۇرىپ وتەدى. قولمەن جينالعان قوقىس ارنايى جاشىكتەرگە توگىلەدى. ال جاشىكتەردەن ارنايى كولىكتەر 5 شاقىرىم جەردە ورنالاسقان پوليگونعا شىعارادى. قازىرگى تاڭدا شارۋاشىلىق قاراماعىندا 10 جۇمىسشى جانە 5 تەحنيكا بار. الداعى ۋاقىتتا ولاردىڭ قاتارىن جاڭا، زامان تالابىنا ساي كولىكتەر مەن قوسىمشا جۇمىسشى كۇشى تولىقتىرا تۇسەدى، دەيدى الاكول اۋداندىق تۇكش ءبولىمى باسشىسىنىڭ مىندەتىن اتقارۋشى ەرجان نۇرپەيىسوۆ.
جەرگىلىكتى بيلىك جاعاجايداعى تازالىقتى قامتاماسىز ەتۋگە بار كۇشىن سالىپ جاتقانىمەن دەمالۋشى قاۋىمنىڭ كۇل- قوقىس توگۋ مادەنيەتى سىن كوتەرمەيدى. اسىرەسە ءوز بەتىمەن جابايى تۇردە دەمالۋعا كەلەتىن حالىقتىڭ قالدىراتىن تۇرمىستىق قالدىقتارى جاعالاۋدىڭ ءسانىن كەتىرەدى. قوقىس جيناپ جۇرگەن جۇمىسشىلاردىڭ ايتۋىنشا، جاعاجاي بويىندا 40 كونتەينەر ورنالاسقان. ءبىراق كەيبىر قوناقتار سول جاشىككە جەتپەي، وتىرعان جەرىندە قوقىس قالدىرىپ جاتادى.
ىرعايتى اۋىلدىق وكرۋگىنىڭ ۋچاسكەلىك ينسپەكتورى ەرىك ورالبايەۆتىڭ مالىمەتىنشە: «تەك وسى جىلدىڭ ەكى ايىندا 50 اكىمشىلىك حاتتاما تولتىرىلعان. 12-ايىپپۇل سالىنىپ، 38 ەسكەرتۋ جاسالعان. ال ءبىر ازامات 5 تاۋلىككە قامالعان» .