بورتىندا 38 ادام بار اسكەري ۇشاق جوعالىپ كەتتى
C-130 Hercules ۇشاعى پۋنتا-ارەناسادان جەرگىلىكتى ۋاقىتپەن 16:55 دە ۇشىپ كەتكەن.
چيلي اسكەري اۋە كۇشتەرىنىڭ مالىمەتىنشە، بورت دۇيسەنبى كۇنى جەرگىلىكتى ۋاقىتپەن 18:00 دەن كەيىن بايلانىسقا شىقپاي قالعان.
ءىز-ءتۇزسىز جوعالعاندار اراسىندا ەكيپاجدىڭ 17 مۇشەسى مەن 21 جولاۋشى بار. چيلي اسكەري اۋە كۇشتەرى ىزدەۋ-قۇتقارۋ وپەراتسياسى جۇرگىزىلىپ جاتقانىن ءمالىم ەتتى.
F-16 ەكى جويعىشى مەن ءتورت كەمە ۇشاقتى ىزدەۋگە جىبەرىلدى.
چيلي ا ا ك گەنەرالى ەدۋاردو موسكەيرا جەرگىلىكتى ب ا ق- قا ۇشاقتىڭ اپات سيگنالىن قوسپاعانىن حابارلادى.
ونىڭ ايتۋىنشا، اسكەري ۇشاق ۇشقىشىنىڭ تاجىريبەسى مول، ول وتىن قورى تاۋسىلعاننان كەيىن جەرگە قونۋعا ءماجبۇر بولۋى مۇمكىن.
چيلي پرەزيدەنتى سەباستيان پينەرا Twitter- دەگى رەسمي اككاۋنتىندا ۇشاقتىڭ جوعالىپ كەتكەنىنە «الاڭداپ»، ەل استاناسى سانتياگوداعى جاعدايدى باقىلاپ وتىرعانىن جازدى.