22:23, 13 - مامىر 2021 | GMT +6
باتىس قازاقستاندا جاپپاي قىرىلعان 380 گە جۋىق كيىك انىقتالدى
ورال. قازاقپارات - باتىس قازاقستان وبلىسىندا 372 باس كيىكتىڭ جاپپاي ولگەنى انىقتالدى، دەپ حابارلايدى قازاقپارات ءتىلشىسى.
وقيعا جانىبەك اۋدانى تاۋ اۋىلدىق وكرۋگىندە (ورتالىعى قايرات اۋىلى) بولدى.
بۇل تۋرالى تۇرعىندار الەۋمەتتىك جەلى ارقىلى حابارلادى. قايرات اۋدان ورتالىعى جانىبەك اۋىلىنان 30 شاقىرىم قاشىقتىقتا ورنالاسقان.
تۇرعىنداردىڭ سوزىنە قاراعاندا، كيىكتەردىڭ ۇشاسى كانال بويىندا، سونداي-اق دالادا جاتىر.
ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى قايرات قادەشيەۆ وقيعانى راستادى.
«ينسپەكتورلار جەرگىلىكتى حالىقتىڭ دەرەگىن انىقتادى. بۇدان بۇرىن وسى ماڭدا قاتتى جاڭبىر مەن نايزاعاي ءجۇرىپ وتكەن. كيىكتىڭ ۇشالارىن تەكسەرگەن كەزدە نايزاعايدىڭ كەسىپ وتكەن ىزدەرى بايقالدى. قوسىمشا سىنامالار الىنىپ، زەرتتەۋگە جىبەرىلىپ جاتىر. بارلىعى 372 باس كيىكتىڭ شىعىنعا ۇشىراعانى بەلگىلى بولدى»، - دەدى قازاقپارات تىلشىسىنە ق. قادەشيەۆ.