الماتىدا ءۇندى شتامى 37 جاستاعى ايەلدەن انىقتالدى - جانداربەك بەكشين

الماتى. قازاقپارات - الماتىدا كوروناۆيرۋستىڭ ءۇندى شتامى انىقتالدى.

بۇل تۋرالى الماتى قالاسى سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتار دارىگەرى جانداربەك بەكشين ءمالىم ەتتى، دەپ حابارلايدى قازاقپارات ءتىلشىسى.

«كەشە 22-ماۋسىم كۇنى كەشكە «دەلتا» شتامىنىڭ بولۋ مۇمكىندىگى انىقتالدى. ءبىز ونى بۇگىن تاعى ءبىر رەت راستادىق. مۋتاتسيالانعان دەلتا شتامىنىڭ شىنىمەن دە اينالىمدا بار ەكەنى بەلگىلى بولدى»، - دەدى ول.

سونىمەن قاتار، ول اتالعان شتامدى كىم جۇقتىرعانىن اتاپ ءوتتى.

«ول - 1984 -جىلى تۋعان ك. ەسىمدى ازاماتشا. ءۇي شارۋاسىنداعى ايەل، ەش جەردە جۇمىس ىستەمەيدى. ونىڭ كۇيەۋى شەتەلدە ءىسساپاردا ءجۇر. ايتا كەتۋ كەرەك، ونىڭ جولداسى اقپان ايىندا كوروناۆيرۋسپەن اۋىرعان. ال ناۋقاستىڭ ءوزى قازىر اۋرۋحانادا جاتىر. ونىمەن بايلانىس جاساعان جەتى ادام وقشاۋلاندى. ەپيدەميولوگيالىق تەكسەرۋ جۇرگىزىلىپ جاتىر. ازىرگە ونىڭ بۇل شتامدى ناقتى قاي جەردە جۇقتىرعانى بەلگىسىز. ول كىسى بىرنەشە نىساندا بولعان. ول جەرلەر باقىلاۋعا الىندى»، - دەدى جانداربەك بەكشين.

اۆتور: الما مۇقانوۆا