تاۋەلسىزدىك جىلدارىندا 376 ميلليارد دوللار شەتەل ينۆەستيتسياسى تارتىلدى - مۇحتار تىلەۋبەردى
بۇل تۋرالى ينۆەستيتسيالار جونىندەگى دوڭگەلەك ۇستەل وتىرىسىندا قر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.
«بيىل قازاقستان تاۋەلسىزدىگىڭ 30 جىلدىق مەرەيتويىن اتاپ وتەدى. سوڭعى 30 جىلدا ۇلكەن ەكونوميكالىق تابىسقا قول جەتكىزدىك. جالپى ىشكى ءونىمى 170 ميلليارد دوللارعا جۋىقتايتىن ورتالىق ازياداعى ەڭ ءىرى ەكونوميكا سانالامىز. وڭىردە جان باسىنا شاققانداعى ءجىو دە ەڭ جوعارى سانالادى ءارى حالىقارالىق رەزەرۆىمىز 90 ميلليارد دوللاردان اسادى. بۇل داعدارىس جانە نارىقتاعى قۇبىلمالى جايت ورىن العان كەزدە ەكونوميكا تۇراقتىلىعىن قامتاماسىز ەتۋگە مۇمكىندىك بەرەدى»، - دەپ اتاپ ءوتتى مينيستر.
ونىڭ اتاپ وتۋىنشە، وسى جىلدىڭ 9 ايىندا ەلىمىزدىڭ جالپى ىشكى ءونىمى 3,5 پايىزعا ارتتى. وسىلايشا، قازاقستان ەكونوميكاسى پاندەمياعا دەيىنگى ءوسىم تراەكتورياسىنا شىقتى دەۋگە بولادى. ءوندىرىس پەن قۇرىلىس سەكتورى ءوسىمنىڭ نەگىزگى كوشباسشىسىنا اينالىپ، ءوزىنىڭ وتاشا كورسەتكىشنەن اسىپ ءتۇستى. قىزمەت كورسەتۋ سەكتورى دا وڭ قارقىنعا يە بولىپ، 9 اي ىشىندە 2,7 پايىز ءوسىم كورسەتتى.
«قازاقستان ەكونوميكاسى دامۋىنىڭ باستى فاكتورى تىكەلەي شەتەل ينۆەستيتسياسى تارتۋ. بۇگىندە ول 376 ميلليارد دوللاردان اسىپ ءتۇستى. شەتەلدىك ءىرى كومپانيالار قازاقستاننىڭ سەنىمدى سەرىكتەسىنە اينالىپ، ىنتىماقتاستىعىمىزعا ۇلكەن ۇلەس قوستى. سونىمەن قاتار ەلىمىزدىڭ الەۋمەتتىك- ەكونوميكالىق دامۋىنا سەرپىن بەردى. بۇگىن ءبىز جاھاندىق ينۆەستيتسيالىق قوعامداستىقپەن ىنتىماقتاستىقتىڭ 30 جىلدىعىن اتاپ وتەمىز. ءبىز سەنىمدى ينۆەستيتسيالىق سەرىكتەس رەتىندە ءوزىمىزدى تانىتا الدىق. بۇگىنگى دوڭگەلەك ۇستەل ءوزارا ءتيىمدى ىنتىماقتاستىعىمىزدى ودان ارى دامىتۋعا قوسىمشا سەرپىن بەرەتىن بولادى»، - دەدى مۇحتار تىلەۋبەردى.
اۆتور: مارلان جيەمباي