تازا قازاقستان: اقمولا وبلىسىندا 376 زاڭ بۇزۋشىلىق انىقتالدى
بۇل تۋرالى قازاقپارات ءى ءى م سىلتەمە جاساپ حابارلايدى.
ۆەدومستۆونىڭ مالىمەتىنشە، ەلىمىزدە 24- شىلدە جانە 30- تامىز ارالىعىندا «تازا قازاقستان» جەدەل الدىن الۋ شاراسى شەڭبەرىندە ەكولوگيالىق رەيد وتۋدە. وسى ماقساتتا اقمولا وبلىسىندا جەرگىلىكتى پوليتسيا قىزمەتى، ەكولوگيا دەپارتامەنتى، اۋداندىق اكىمدىكتەر، ت ج بولىمدەرى قىزمەتكەرلەرى مەن قوعام بەلسەندىلەرى جانە جۋرناليستەردەن قۇرالعان موبيلدىك توپ قۇرىلدى.
شارانىڭ ماقساتى، ەكولوگيالىق جاعدايدى جاقسارتۋ جانە تابيعات اياسىنا بولعاندا مادەنيەتتىلىك دەڭگەيىن كوتەرۋدى ءتۇسىندىرۋ.
«بىرلەسكەن رەيدى كەزىندە اقمولا وبلىسىندا تابيعاتتى قورعاۋ سالاسىندا 376 زاڭ بۇزۋشىلىق انىقتالدى. ونىڭ 171 ءى ق ر ا ق ب ك 505- بابى (قالالار مەن ەلدى مەكەندەردىڭ اۋماقتارىن اباتتاندىرۋ ەرەجەسىن بۇزۋ) بويىنشا. ءتارتىپ ساقشىلارى شۋچە-بۋراباي كۋرورتتى ايماعى، زەرەندى دەمالىس ايماعى جانە قوپا كولىنىڭ جاعاجاي اۋماعىندا 153 زاڭ بۇزۋشىلىقتى تىركەدى.
بۇدان بولەك، رەيد كەزىندە 44 ازاماتتىڭ جاعاجاي اۋماعى مەن قوعامدىق ورىنداردا الكوگولدىك ماساڭ كۇيدە جۇرگەنى انىقتالدى. سۋدى پايدالانۋ ەرەجەسىنىڭ 108 رەت بۇزىلعاندىعى، قوعامدىق ورىنداردى لاستاۋدىڭ 45 جاعدايى انىقتالىپ، اكىمشىلىك حاتتاما تولتىرىلدى»، - دەلىنگەن ءى ءى م حابارلاماسىندا.
رەيد بارىسىندا جاعجايلار مەن ساياباقتار جانە قوعامدىق ورىندار تەكسەرىلەتىن بولادى. سونىمەن قاتار، موبيلدىك توپ كارانتين تالاپتارىنىڭ ساقتالۋىنا نازار اۋدارادى. بۇل باعىتتاعى جۇمىستار تامىز ايىنىڭ سوڭىنا دەيىن جالعاسادى.