بايدىبەك اۋدانىندا 36 مال تاسقىن سۋ استىندا قالدى
باقىتجان زاپاروۆتىڭ ايتۋىنشا، قازىر تۇركىستان وبلىس اۋماعىندا جاعداي تۇراقتالعان. سۋدىڭ كەلۋى دە توقتاعان. دەگەنمەن تاسقىن سۋدان ءالى دە قاۋىپ بار.
«وڭىردەگى بەس اۋداندا 20 ەلدى مەكەندى سۋ الدى. 27 كوشە مەن 234 ءۇيدىڭ اۋلاسىنا سۋ كىردى. جەرگىلىكتى اتقارۋشى ورگاندار مەن تجد قىزمەتكەرلەرىمەن 204-تەن استام تۇرعىن قاۋىپسىز جەرگە كوشىرىلدى. 790 ۇساق مال قۇتقارىلدى. بايدىبەك اۋدانىندا 36 مال قىرىلدى دەگەن اقپارات تىركەلدى. جالپى بىرنەشە ايدان بەرى وڭىردە جۇرگىزىلگەن الدىن الۋ جۇمىستارىنىڭ ناتيجەسىندە تاسقىن سۋدان كەلەر الاپات اپاتقا جول بەرىلگەن جوق. ساۋراندا 4 ەۆاكۋاتسيالىق ورتالىق ۇيىمداستىرىلدى. دەپارتامەنتتە شتاب قۇرىلدى. وبلىس اۋماعىندا سۋ سەيىلگەنمەن، ءالى دە قاۋىپ بار دەپ ەسەپتەيمىز. تاۋلى اۋماقتاعى تولەبي، قازىعۇرت اۋداندارىندا ءالى دە قار بار. جاڭبىر جاۋسا وسىنداي توتەنشە جاعداي ورىن الۋى مۇمكىن» - دەدى ول.
توتەنشە جاعداي ماماندارىنىڭ ايتۋىنشا، وڭىرگە 7 ساعاتتىڭ ىشىندە جاۋعان جاڭبىردىڭ كولەمى 10 كۇندىك مولشەردەن اسىپ تۇسكەن. سونىمەن قاتار 2-4- اقپان كۇندەرى تاۋلى ايماقتاردا جاڭبىر، قار جاۋۋى ىقتيمال. سوندىقتان ءاربىر اۋدان، قالادا سۋ تاسقىنىنىڭ الدىن الۋ جۇمىستارى ءجۇرىپ جاتىر جانە سۋ باسۋ قاۋپى بار ايماقتار مەن سۋ نىساندارىندا 24 ساعاتتىق كەزەكشىلىك ۇيىمداستىرىلعان.
ەسكە سالا كەتەيىك، 2 -اقپاندا كەنتاۋ، تۇركىستان قالالارىندا جانە بايدىبەك، ساۋران، ورداباسى اۋداندارىندا جاۋىن- شاشىننان كوشەلەر مەن اۋلالاردى سۋ باسىپ جاتقانىن حابارلاعان ەدىك.
اۆتور
قايرات زاينيشيەۆ