اقمولادا جىل سوڭىنا دەيىن 36 مەملەكەتتىك مەكەمەنىڭ اتاۋى وزگەرەدى
بۇل تۋرالى جۋرناليستەرمەن وتكەن بريفينگتە وبلىستىق ىشكى ساياسات باسقارماسىنىڭ باسشىسى التىناي امىرەنوۆا ءمالىم ەتتى، دەپ حابارلايدى قازاقپارات ءتىلشىسى.
بريفينگتە باسقارما باسشىسى، ءتىل ساياساتىنىڭ ماڭىزدى باعىتى - ونوماستيكا ماسەلەسىنە توقتالدى.
«ەلىمىزدە ۇلتتىق ساناق وتكىزىلۋىنە بايلانىستى 2020-جىلدان باستاپ ەلدى مەكەندەر مەن كوشەلەردى قايتا اتاۋ جۇمىستارى ءبىرشاما توقتاپ قالدى. الايدا، ءتۇسىندىرۋ جانە زەرتتەۋ جۇمىستارى جۇرگىزىلىپ جاتىر. اقمولا وبلىسى ەلدى مەكەندەردىڭ تاريحي اتاۋلارىن انىقتاۋ ماقساتىندا بىرنەشە جىلدان بەرى قر ۇلتتىق مۋزەيىمەن بىرلەسىپ جۇمىس ىستەۋدە. قازىرگى ۋاقىتتا وبلىس اۋماعىنداعى 120 ەلدى مەكەننىڭ تاريحي اتاۋلارى تابىلىپ، باق جانە الەۋمەتتىك جەلىلەرگە جاريالانىپ، جەرگىلىكتى حالىققا ءتۇسىندىرۋ جۇمىستارى جۇرگىزىلۋدە. بيىلعى جىلدىڭ سوڭىنا دەيىن 36 مەملەكەتتىك مەكەمەنىڭ اتاۋىن وزگەرتۋدى جوسپارلاپ وتىرمىز. وبلىس اۋماعىنداعى مەكتەپتەرگە حالقىمىزدىڭ ماقتان تۇتار تۇلعالارىنىڭ ەسىمى بەرىلمەكشى»، - دەدى التىناي امىرەنوۆا.
سونىمەن بىرگە، باسقارما باسشىسى 2021-جىلدىڭ ءبىرىنشى جارتىجىلدىعىندا اقمولا وبلىسىنا قاراستى 26 مەملەكەتتىك مەكەمەگە پروفيلاكتيكالىق باقىلاۋ جۇمىستارى جۇرگىزىلگەنىن اتاپ ءوتتى.
«پروفيلاكتيكالىق باقىلاۋ بارىسىندا «قازاقستان رەسپۋبليكاسىنداعى ءتىل تۋرالى» قازاقستان رەسپۋبليكاسى زاڭىنىڭ بىرنەشە باپتارى بۇزىلعانى انىقتالدى. قازىرگى ۋاقىتتا بۇزۋشىلىقتار تۇزەتىلدى. تاعى ءبىر ايتا كەتەتىن وزەكتى ماسەلەنىڭ ءبىرى - سىرتقى كورنەكى اقپاراتتاردىڭ جانە جارنامالاردىڭ ءتىل زاڭنامالارىنا سايكەستىگى مەن ساۋاتتىلىعى. بۇل ماسەلە ءبىزدىڭ باسقارمانىڭ ۇنەمى نازارىندا.
2021-جىلدىڭ 1-جارتىجىلدىعىندا زاڭعا قايشى جانە ساۋاتسىز جارنامالاردىڭ الدىن الۋ ماقساتىندا وبلىس اۋماعىندا «قالا كەلبەتى»، «اۋىل كەلبەتى» اتتى 102 رەيد جۇمىستارىن جۇرگىزىلدى. جۇمىس بارىسىندا 1105 ساۋدا جانە قىزمەت كورسەتۋ وبەكتىسىنە مونيتورينگ جۇرگىزىلىپ، زاڭناما تالاپتارىن بۇزعان 1910 جارناما انىقتالدى. اتالعان زاڭبۇزۋشىلىقتاردى جويۋ ماقساتىندا ءتىل زاڭنامالارىنا ءتۇسىندىرۋ جۇمىستارى جۇرگىزىلىپ، قازاقستان رەسپۋبليكاسىنداعى جارناماعا قويىلاتىن جالپى تالاپتار جازىلعان بۋكلەتتەر تاراتىلدى. ناتيجەسىندە زاڭ تالاپتارىن بۇزعان 136 جارنامانى الىپ تاستاسا، 977 ءى تۇزەتىلدى»، - دەدى التىناي امىرەنوۆا.
بۇدان بولەك، بريفينگتە ايتىلعانداي، كورنەكى اقپاراتتاردىڭ دۇرىس جازىلۋى بويىنشا ءتۇسىندىرۋ جانە كەڭەس بەرۋ جۇمىستارىن ۇيىمداستىرۋ ماقساتىندا 34 شارا وتكىزىلىپتى. وبلىس اۋماعىندا «جەدەل جەلى» تەلەفوندارىنا جەكە كاسىپكەرلەر تاراپىنان 411 قوڭىراۋ شالىنىپ، كورنەكى اقپاراتتار مەن جارنامالارعا قاتىستى سۇراقتارىنا جاۋاپ بەرىلدى جانە 442 جارناما ەسكيزىنە كەلىسۋ جۇمىستارى جۇرگىزىلدى.
مۇنداي شارالار الداعى ۋاقىتتا دا جالعاسىن تاباتىن بولادى.