تەڭىز كەنىشىندەگى 36 جۇمىسشىدان كوروناۆيرۋس انىقتالدى

اتىراۋ. قازاقپارات - اتىراۋ وبلىسىندا سوڭعى ەكى تاۋلىكتە 111 ادام كوروناۆيرۋس ينفەكتسياسىن جۇقتىردى، دەپ حابارلايدى قازاقپارات.

سوڭعى ەكى تاۋلىكتە قاۋىپتى ۆيرۋسقا شالدىققاندار سانى اتىراۋ قالاسى مەن تەڭىز كەنىشىندە كۇرت وسكەن.

ماسەلەن، وڭىردە 22- ناۋرىزدا 48، ال 23- ناۋرىزدا 63 ناۋقاس تىركەلگەن. ونىڭ ىشىندە اتىراۋ قالاسىندا ەكى تاۋلىكتە 53 ادامنان كوروناۆيرۋس ينفەكتسياسىنىڭ بەلگىسى انىقتالعان.

ال، تەڭىز كەنىشىندە ەكى تاۋلىكتە 36 جۇمىسشى قاۋىپتى ىندەتتى جۇقتىرعان. سونداي-اق، ەكى تاۋلىكتە جىلىوي، قۇرمانعازى، قىزىلقوعا، يساتاي اۋداندارىنىڭ تۇرعىندارىنان دا قاۋىپتى ۆيرۋس انىقتالىپ وتىر.

اسىرەسە، جىلىويدا -9، ال، قۇرمانعازى اۋدانىندا 11 ناۋقاس تىركەلگەن. قازىر 213 پاتسيەنت ءۇي جاعدايىندا ەم الۋدى جالعاستىرۋدا. وبلىستىق ينفەكتسيالىق ستاتسيوناردا 33، مودۋلدىك ستاتسيوناردا 78، اۋداندارداعى ستاتسيونارلاردا 17 ناۋقاس ەم قابىلداۋ ءۇشىن وقشاۋلانعان.

ال، تەڭىز كەن ورنىنداعى ينفەكتسيالىق ستاتسيوناردا 256 ادام ەمدەلىپ جاتىر.

ەسكە سالا كەتەلىك، بۇدان بۇرىن اتىراۋدا مودۋلدىك ينفەكتسيالىق ستاتسيونارعا العاشقى 20 ناۋقاس جاتقىزىلعانىن جازعان ەدىك.