نۇر-سۇلتاندا ەكى كۇندە كارانتين ءتارتىبى 36 رەت بۇزىلعان
سوڭعى ەكى كۇندە پوليتسەيلەر، ەپيدەميولوگتار، ۆولونتەرلەر مەن جەرگىلىكتى اتقارۋشى ورگان وكىلدەرىنەن قۇرالعان موبيلدىك توپتار نۇر-سۇلتان قالاسىندا 36 ءتارتىپ بۇزۋ وقيعاسىن تىركەدى.
ولاردىڭ 13 ءى ماسكا تاعۋ مەن الەۋمەتتىك قاشىقتىقتى ساقتاماۋ سىندى مىندەتتى ەرەجە بولسا، 23 ءى تىيىم سالىنعان ۋاقىتتا دا جۇمىسىن جالعاستىرعان كاسىپكەرلەرگە قاتىستى. ماتەريالدار دەنساۋلىق ساقتاۋ جەرگىلىكتى اتقارۋشى ورگانى - تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە جىبەرىلدى.
پوليتسەيلەر ويىن-ساۋىق نىساندارىنا، قوعامدىق تاماقتانۋ ورىندارى، ساۋنا، مونشا، اتتراكتسيوندارعا بارىپ، كارانتين ەرەجەلەرىن ءتۇسىندىرىپ، ءتارتىپ بۇزۋ فاكتىلەرىن انىقتايدى. 26- شىلدە كۇنى تۇنگى 02:18 دە مايلين كوشەسىندە كەلۋشىلەردى قابىلداپ جاتقان كافەنى انىقتاعان. باردا ءبي الاڭىندا كوڭىل كوتەرىپ جۇرگەن 37 كليەنت بولعان. ولار ءستول باسىندا الەۋمەتتىك قاشىقتىقتى ساقتاماي، باس سانيتاريا دارىگەرىنىڭ قاۋلىسىن بۇزعان.
سونىمەن قاتار تەكسەرىس بارىسىندا بەيسەكوۆ كوشەسىندە اۆتوكولىك جوندەۋمەن اينالىسىپ جاتقان تەحنيكالىق قىزمەت كورسەتۋ ورنىنىڭ اكىمشىلىگى تاراپىنان ءتارتىپ بۇزۋ فاكتىسى تىركەلدى.
27- شىلدە كۇنى قاتاڭ كارانتين شارالارىنىڭ بۇزىلۋىنا جول بەرمەۋ ماقساتىندا اۋداندىق باسقارما قىزمەتكەرلەرى مەن اۋدان اكىمدىگىنىڭ وكىلدەرى جانە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسى وكىلدەرىمەن بىرلەسىپ مۇستافين كوشەسىندەگى قوناق ءۇي كەشەنىنىڭ جۇمىسى جالعاسىپ جاتقانىن انىقتادى.
تەكسەرۋ بارىسىندا كافەدە 12 ادام بولعان. جينالعان ماتەريالدار ق ر ا ق ب ك 425-بابى بويىنشا اكىمشىلىك جاۋاپقا تارتۋ ءۇشىن تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە جىبەرىلدى.
نۇر-سۇلتان قالاسىنىڭ پوليتسيا دەپارتامەنتى ازاماتتاردى قوعامدىق ورىندارداعى ەرەجەگە جاۋاپكەرشىلىكپەن قاراپ، سانيتاريا تالاپتارىن ورىنداۋعا شاقىرادى. كوروناۆيرۋس تارالىپ كەتپەس ءۇشىن پوليتسەيلەر ازاماتتارعا كارانتين ءتارتىبىن ساقتاۋ مەن جەكە قورعانىس قۇرالدارىن تاعۋدىڭ ماڭىزدىلىعى تۋرالى تۇسىندىرمە جۇمىستارىن جۇرگىزىپ جاتىر.