تۇركىستان وبلىسىنداعى جەدەل شتاب 36 مىڭعا تارتا ازاماتتى تەكسەردى

تۇركىستان. قازاقپارات - تۇركىستان وبلىسىنداعى پوليتسيا دەپارتامەنتىندەگى جەكە قۇرامنىڭ قىزمەتى ەرەكشە جاعدايعا كوشىرىلىپ، توقتاۋسىز جۇمىس جۇرگىزىلۋدە.

وڭىردە اسا ماڭىزدى مەملەكەتتىك، ستراتەگيالىق، رەجىمدىك ءارى ەرەكشە قورعالاتىن جانە حالىقتىڭ تىنىس-تىرشىلىگىن، كولىك قىزمەتىنىڭ جۇمىس ىستەۋىن قامتاماسىز ەتەتىن نىساندار تولىق كۇزەتىلۋدە، دەپ حابارلايدى قازاقپارات ءتىلشىسى.

ەلىمىزدە كوروناۆيرۋسقا قاتىستى توتەنشە جاعداي ەنگىزىلۋىنە بايلانىستى تۇركىستان وبلىسى اكىمىنىڭ جانىنان جەدەل شتاب قۇرىلعان.

ايماقتا وزگە قالالاردان كەلگەن ازاماتتاردى، كولىكتەردى تەكسەرىپ وتكىزۋ ماقساتىندا تۇلكىباس اۋدانىندا «شاقپاق» جانە كەنتاۋ قالاسى اۋماعىنا «ساۋران» شەپ بەكەتتەرى قويىلعان. سونداي-اق، ازاماتتاردى ەسەپكە الۋ جۇمىستارى جۇرگىزىلۋدە.

بۇگىننىڭ وزىندە بۇل بەكەتتەردەن 13296 اۆتوكولىك پەن 35976 ازامات تەكسەرىلىپ وتكىزىلگەن.

بۇدان بولەك، وبلىس اۋماعىندا بارلىق ەلدى مەكەندەردە توي-تومالاق وتكىزگەن جاعدايدا قاتاڭ جاۋاپكەرشىلىككە تارتىلاتىنى ەسكەرتىلدى. توتەنشە جاعداي ەنگىزىلۋىنە بايلانىستى، زاڭ تالاپتارىن ساقتاماعان تۇلعالارعا قاتىستى، ق ر ا ق ب ت ك- ءنىڭ 476-بابىمەن 54 اكىمشىلىك قۇقىق بۇزۋشىلىق تۋرالى حاتتاما تولتىرىلعان. سونداي-اق، جىل باسىنان كورونوۆيرۋسقا قاتىستى پوليتسيا دەپارتامەنتى ق ر قىلمىستىق كودەكسىنىڭ 274-بابىمەن (كورىنەۋ جالعان اقپارات تاراتۋ) 7 قىلمىستىق ءىس قوزعاعان.

بارلىق قىلمىستىق ءىس بويىنشا تەرگەپ-تەكسەرۋ امالى جۇرگىزىلىپ جاتىر.

جالپى تۇركىستان وبلىسىنىڭ اۋماعىندا ءىرى ساۋدا ورتالىقتارى مەن بازارلار، اۆتوۆوكزالدار مەن مەگا ورتالىعى، ونىڭ ىشىندە 1 كينوتەاتر مەن كافە-بار ورنالاسقانى بەلگىلى.

توتەنشە جاعدايعا بايلانىستى ءىرى ساۋدا ورتالىقتارىنىڭ قىزمەت كورسەتۋ ۋاقىتى ساعات 10.00 دەن 18.00 گە، بازارلار 11:00 دەن 17:00 گە دەيىن شەكتەلگەن.

«مەگا» ساۋدا ويىن-ساۋىق ورتالىعىنداعى كينوتەاتر جۇمىسى كارانتينگە بايلانىستى توقتاتىلسا، 1133 كافە- باردى ساعات 22.00 دەن كەيىن جابۋ جۇمىستارى جۇرگىزىلۋدە.