قوستانايدا 36 مىڭعا جۋىق ادامنىڭ جالاقىسى وسەدى
«5 -قازاندا قازاقستان پرەزيدەنتى حالىققا جولداۋىن جاريالاعان بولاتىن. ەلباسىنىڭ تىكەلەي تاپسىرماسىمەن تومەن جالاعا الاتىن جۇمىسكەرلەردىڭ ايلىعىن 28 مىڭنان 42 مىڭ تەڭگەگە دەيىن ءوسىرۋ جۇكتەلگەن ەدى. ول بويىنشا وبلىسىمىزدى جوسپارلى جۇمىستار جۇرگىزىلىپ جاتىر. بيۋدجەتتىك ۇيىمداردا، اتقارۋشى بيلىكتە قيىندىق جوق. قاراجاتتىڭ بارلىعى شەشىلدى. 1 قاڭتاردان باستاپ جالاقى كوتەرىلەدى»، - دەدى قوستاناي وبلىسىنىڭ اكىمى ارحيمەد مۇحامبەتوۆ و ك ق- دا وتكەن بريفينگتە.
ونىڭ ايتۋىنشا، ايماقتاعى جەكە كاسىپورىندار، ءىرى كومپانيالار، ورتا جانە شاعىن بيزنەس وكىلدەرى ەلباسىنىڭ جولداۋىن بۇگىنگى تاڭدا تولىق قولداپ وتىر.
«مىسالى، 200-دەن استام كاسىپورىندا 36 مىڭ جۇمىسكەردىڭ جالاقىلارى ءوسىپ جاتىر. مىسالى، 1 -قاراشاداعى كورسەتكىش بويىنشا 180 مەكەمەدە 4500 ادامنىڭ جالاقىسى كوبەيدى. 1 -جەلتوقساننان 337 مەكەمەدە 7600 ادامنىڭ جالاقىلارى ەداۋىر وسەتىن بولادى. قالعان مەكەمەلەردە 1 -قاڭتاردان باستاپ وسەدى»، - دەدى ول.
ارحيمەد مۇحامبەتوۆتىڭ ايتۋىنشا، «بايان سۇلۋ» كونديتەرلىك فابريكاسىندا، «سارى ارقا اۆتوپروم» ا ق-دا، «اگروماش حولدينگ»، «ميلك» كومپانيالارىندا تومەن جالاقى بولماعانىمەن، ول كومپانيالار ەلباسىنىڭ باستاماسىن قولداپ، قىزمەتكەرلەرىنىڭ جالاقىلارىن 10-20 پايىزعا كوبەيتۋدە.
ەسكە سالا كەتسەك، اتالمىش بريفينگتە ارحيمەد مۇحامبەتوۆ قوستاناي وبلىسىندا جىل باسىنان بەرى اۆتوكولىك قۇراستىرۋ 15,7 پايىزعا ارتقانىن ايتقان بولاتىن. ونىڭ سوزىنە قۇلاق اسساق، وسىنداي وسىممەن قوستاناي وبلىسى 2023 -جىلعا قاراي جىلىنا 60 مىڭ اۆتوكولىك شىعارۋدى كوزدەپ وتىر.
سونداي-اق، ايماق باسشىسى وڭىردەگى اگروونەركاسىپتىك كەشەن سالاسىنا سيفرلىق تەحنولوگيالار قالاي ەنگىزىپ جاتقانىن ايتىپ بەرگەن ەدى.