قويشى وزىنە سەنىپ تاپسىرىلعان 360 باس قويدى ساتىپ جىبەرگەن
ناتيجەسىندە مال يەسىنە 16 ميلليون تەڭگەدەي شىعىن كەلتىرگەن، دەپ حابارلايدى قازاقپارات ءتىلشىسى.
وبلىستىق پ د باسپا ءسوز قىزمەتىنىڭ مالىمەتىنشە، شاردارا اۋداندىق پوليتسيا بولىمىنە جەرگىلىكتى تۇرعىن ارىزدانعان. ول ءوزىنىڭ جالداپ وتىرعان قويشىسىنىڭ سەنىپ تاپسىرىلعان مۇلكىن جۇمساپ جۇرگەندىگى تۋرالى حابارلاعان. جەدەل-ىزدەستىرۋ ءىس-شارالارىنىڭ ناتيجەسىندە پوليتسەيلەر قويشى بولىپ جۇرگەن تۇرعىندى قولعا ءتۇسىردى.
تەرگەۋ كەزىندە جابىرلەنۋشىنىڭ اتالمىش قويشىعا 360 باس قويىن باعىپ كوبەيتۋ ماقساتىندا سەنىپ تاپسىرعانى انىقتالدى. الايدا، ءۇش جىل ىشىندە كۇدىكتى قويلاردىڭ بارلىعىن ساتىپ جىبەرگەن بولىپ شىقتى. كەلتىرىلگەن شىعىننىڭ جالپى كولەمى شامامەن 16 ميلليون تەڭگەنى قۇراپ وتىر. قازىرگى تاڭدا وسى جايتكە قاتىستى بوتەننىڭ مۇلكىن يەمدەنۋ مەن تالان-تاراجعا سالۋ جايتى بويىنشا سوتقا دەيىنگى تەكسەرۋ امالدارى جۇرگىزىلىپ، كۇدىكتى قاماۋعا الىندى.