جاستار «دارىن» سىيلىعىنا ەندى 35 جاسقا دەيىنگى ازاماتتار ءوتىنىش بەرە الادى

None
استانا. قازاقپارات – ق ر ۇكىمەتىنىڭ 2023-جىلعى 3- ناۋرىزداعى قاۋلىسىمەن «دارىن» سىيلىعىن بەرۋ جانە «تاۋەلسىزدىك ۇرپاقتارى» گرانتىن تاعايىنداۋ ەرەجەلەرىنە وزگەرىستەر ەنگىزىلدى، دەپ حابارلايدى قازاقپارات ءتىلشىسى.

«حالىقارالىق جانە رەسپۋبليكالىق كونكۋرستاردىڭ، فەستيۆالدار مەن كورمەلەردىڭ لاۋرەاتتارى، رەسپۋبليكالىق جانە حالىقارالىق دەڭگەيدەگى سپورتتىق جارىستاردىڭ جۇلدەگەرلەرى مەن جەڭىمپازدارى، سونداي-اق يننوۆاتسيالىق باعىتتا قىزمەت اتقاراتىن جانە تۇتاستاي قوعامنىڭ دامۋىنا ىقپال ەتەتىن 35 جاستان اسپاعان ق ر ازاماتتارى سىيلىق الۋعا ۇمىتكەر بولا الادى»، - دەلىنگەن قۇجاتتا.

ايتا كەتەيىك، بۇرىن «دارىن» سىيلىعى مەن «تاۋەلسىزدىك ۇرپاقتارى» گرانتى 29 جاستان اسپاعان قازاقستاندىقتارعا تاعايىندالاتىن.

سىيلىقتى ءار نوميناتسيا بويىنشا ەڭ كوپ دەگەندە تەك 2 ۇمىتكەرگە بەرۋگە رۇقسات ەتىلەدى. بۇل جاعدايدا اقشالاي سىياقى ولاردىڭ اراسىندا تەڭ بولىنەدى. سىيلىقتى بۇرىن العان ازامات قايتا ءوتىنىش بەرە المايدى.

ەسكە سالايىق، بىلتىر 8- جەلتوقساندا سەنات 35 جاسقا دەيىنگىلەردى «جاستار» ساناتىنا ەنگىزۋ تۋرالى زاڭ جوباسىن ماقۇلداعان ەدى.


سوڭعى جاڭالىقتار