13:50, 24 - ناۋرىز 2020 | GMT +6
الماتىدا كوروناۆيرۋس جۇقتىرعان 35 جاستاعى پاتسيەنت ىستانبۇلدان ۇشىپ كەلگەن
الماتى. قازاقپارات - الماتىدا كوروناۆيرۋس شىققان پاتسيەنتتەردىڭ ءبىرى ىستانبۇلدان ۇشىپ كەلگەن، دەپ حابارلايدى قازاقپارات ءتىلشىسى.
Coronavirus2020.kz مالىمەتىنشە، 1985-جىلى دۇنيەگە كەلگەن ءبىرىنشى پاتسيەنت 19- ناۋرىز كۇنى ىستانبۇل- الماتى رەيسىمەن ۇشىپ كەلگەن. ال ەكىنشىسى بۇعان دەيىن ماسكەۋ-الماتى رەيسىمەن كەلگەن، كوروناۆيرۋس انىقتالعان پاتسيەنتپەن بايلانىستا بولعان.
قازىرگى ۋاقىتتا پاتسيەنتتەردىڭ دەنساۋلىعى قاناعاتتانارلىق جاعدايدا.
بۇگىندە قالانىڭ كلينيكالىق جۇقپالى اۋرۋلار اۋرۋحاناسىندا 29 پاتسيەنت جاتىر. ەكى ناۋقاستىڭ جاعدايى ورتاشا اۋىر. ولاردىڭ ىشىندە ءبىر بالادا وڭ وزگەرىستەر بايقالادى. ال قالعان ناۋقاستاردىڭ جاعدايى ءبىرقالىپتى.
قازىرگى ۋاقىتتا پروۆيزورلىق گوسپيتالدەردە - 672 ادام، كارانتيندە - 598 ادام، ءۇي كارانتينىندە - 1549 ادام جاتىر. كارانتيندە جاتقان ادامداردىڭ دەنە قىزۋى نورما شەگىندە، كاتارالدى اۋىتقۋلار جوق.