ەلوردادا 35 جاستاعى شەتەل ازاماتى ءوزىن پىشاقپەن جارالادى

نۇر-سۇلتان. قازاقپارات - ەلورداداعى ساۋدا جانە ويىن-ساۋىق ورتالىقتارىنىڭ بىرىندە قولىنا پىشاق ۇستاعان ەر ادام جۇرتتىڭ زارە-قۇتىن قاشىردى، دەپ حابارلايدى قازاقپارات Polisia.kz رەسۋرسىنا سىلتەمە جاساپ.

الەۋمەتتىك جەلىدە ەر ادامنىڭ پىشاقپەن ءوزىن جارالاعانى بەينەلەنگەن ۆيدەو تارادى.

بۇگىن 18:28-دە 102 قىزمەتىنە Mega Silk Way ساۋدا ورتالىعىندا 1985 -جىلى تۋعان تۇركيا ازاماتىنىڭ ماس كۇيىندە ءوزىن جارالاعانى تۋرالى حابار كەلىپ تۇسكەن. ول بىلەگىنىڭ بىرنەشە جەرىنەن پىشاقپەن كەسكىلەگەن. جانىنداعى ادامدار جابىلىپ ءجۇرىپ، ەركەكتىڭ قولىنداعى پىشاعىن تارتىپ الدى. ءسويتىپ باسقا كەلۋشىلەرگە قاۋىپ تونبەدى.

ءتارتىپ بۇزعان ازاماتقا مەديتسينالىق كومەك كورسەتىلدى.

قازىرگى تاڭدا ول ق ر زاڭناماسىنا سايكەس جاۋاپكەرشىلىككە تارتىلدى. ودان بولەك، شەتەلدىكتى ەلدەن شىعارۋ ماسەلەسى قارالىپ جاتىر.

ەلوردالىق پوليتسيا دەپارتامەنتىنىڭ باسشىلىعى حالىققا قاۋىپ توندىرگەن ازاماتقا قارسى تۇرىپ، بەلسەندى ازاماتتىق پوزيتسياسىن كورسەتە بىلگەن استانالىقتارعا العىس ايتادى.