ەلىمىزدە 35 مىڭ ادام كومىر ونەركاسىبى سالاسىندا قىزمەت ەتەدى
جىل سايىن تامىزدىڭ سوڭعى جەكسەنبىسىنە كەلەتىن شاحتەرلەر كۇنىن ەلوردا جۇرتى دا اتاپ ءوتتى. كاسىبي مەرەكەگە وراي ۇيىمداستىرىلعان سالتاناتتى جيىن الدىندا قاتىسۋشىلار جۇمىس بارىسىندا قازا تاپقان شاحتەرلەردى ءبىر مينۋت ۇنسىزدىكپەن ەسكە الدى.
ق ر يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى تيمۋر توقتابايەۆ شاحتەرلەردى قۇتتىقتاپ، قازاقستاننىڭ كەندى وڭىرلەرىندە ەڭبەكتەنىپ جاتقان 19 كاسىپورىننىڭ قىزمەتكەرلەرىنە «شاحتەر داڭقى»، «ەڭبەك داڭقى»، «كەنشى داڭقى»، «كومىر ونەركاسىبىنىڭ قۇرمەتتى قىزمەتكەرى» توسبەلگىلەرىن تابىس ەتتى.
«ەلىمىزدىڭ كومىر ءوندىرىسى كەشەنى دامىپ، باسەكەگە قابىلەتتىلىگى ارتىپ كەلەدى. كەنشىلەردىڭ ەڭبەك قاۋىپسىزدىگىن قامتاماسىز ەتۋ ءۇشىن كوپتەگەن جۇمىستار اتقارىلۋدا. كەلەشەكتە دە الدىڭعى بۋىننىڭ تاجىريبەسىنە سۇيەنە وتىرىپ، الدا تۇرعان مىندەتتەردى تابىستى اتقاراتىندارىڭىزعا سەنەمىن»، - دەدى تيمۋر توقتابايەۆ.
ونىڭ ايتۋىنشا، كومىر سالاسى ەلەكتر ەنەرگياسى ءوندىرىسىنىڭ 70 پايىزىن، كوكس- حيميا ءوندىرىسىنىڭ 100 پايىزىن قامتاماسىز ەتەدى. كوممۋنالدىق- تۇرمىستىق سەكتور مەن حالىقتىڭ وتىنعا دەگەن قاجەتتىلىگىن تولىق قاناعاتتاندىرادى. كومىر ونەركاسىبى قىزمەتكەرلەرىنىڭ سانى شامامەن 35 مىڭ ادامدى قۇرايدى.
كاسىبي مەرەكەگە وراي قازاقستان بويىنشا 62 ماراپاتتالعان. ولاردىڭ ىشىندە «كومىر ونەركاسىبىنىڭ قۇرمەتتى قىزمەتكەرى» اتاعىن «مايكۋبەن ۆەست» ج ش س باس مەحانيگى مارات قۋات ۇلى كيرماندايەۆ يەلەنسە، «شۇباركول كومىر» ا ق تەحنيكالىق ءبولىمىنىڭ باستىعى ۆلاديمير نيكولايەۆيچ كوسيتسين «شاحتەر داڭقى» اتاعىن يەلەندى. ال «ەڭبەك داڭقى» ماراپاتى «بوگاتىر كومير» ج ش س- ءنىڭ وقۋ- كۋرستىق كومبيناتى باستىعىنىڭ ورىنباسارى ەلەنا ميحايلوۆنا كۋزنەتسوۆاعا بەرىلدى.
تاۋەلسىزدىك جىلدارى قازاقستاننىڭ كومىر ءوندىرۋشى كاسىپورىندارى 2,6 ميلليارد توننادان استام كومىر وندىرگەن. ونىڭ 0,8 ميلليارد تونناعا جۋىعى ەكسپورتتالدى. كومىر قورى بويىنشا قازاقستان الەمدەگى ون ەلدىڭ قاتارىنا كىرەدى. بارلانعان كومىر قورىنىڭ % 90 استامى قازاقستاننىڭ سولتۇستىك- شىعىس جانە ورتالىق بولىگىندە شوعىرلانعان.
اۆتور: ەسىمجان ناقتىباي