ساپاربايەۆ: مىندەتىمىز — بيىل كەمىندە 350 مىڭ وتباسىن جۇمىسپەن قامتۋ
بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ الەۋمەتتىك سالادا بەرگەن تاپسىرمالارى قابىلدانعان ءىس-شارالارعا سايكەس جۇرگىزىلەدى. ەڭ ءبىرىنشى اتاۋلى الەۋمەتتىك كومەك كەم دەگەندە 200 مىڭ مۇقتاج وتباسىنا، 600 مىڭ بالاعا تولەنەتىن بولادى. مىندەت وسى جىلى 350 مىڭ وتباسىن جۇمىسپەن قامتاماسىز ەتۋ»، - دەدى بەردىبەك ساپاربايەۆ.
سونىمەن قاتار، ول مىندەتتى مەديتسينالىق ساقتاندىرۋ ەنگىزۋ بويىنشا اقپاراتتاردى وزەكتەندىرۋ، ەسەپكە الۋ، تۇرعىنداردىڭ مارتەبەسىن انىقتاۋ جۇمىستارى جالعاسىن تابادى. بارلىق وڭىردە قۇرىلعان جۇمىس توپتارى، شتابتار وسى جۇمىسپەن اينالىسادى.
«كەشە ءسىزدىڭ تاپسىرماڭىزعا سايكەس بارلىق وبلىس اكىمدەرىنىڭ ورىنباسارلارىمەن، باسقارما باسشىلارىمەن وسى جونىندە سەلەكتورلىق ءماجىلىس وتكىزىلدى. وندا تاعى تاپسىرما بەرىلدى. اسىرەسە ءتۇسىندىرۋ، دەر كەزىندە مالىمەت، اقپارات بەرۋ قاتاڭ تاپسىرىلدى. زەينەتاقى جۇيەسىن رەفورمالاۋ تاپسىرماسىنا سايكەس 24 - قاڭتاردا جۇمىس توبىنىڭ كەزەكتى وتىرىسى بولدى. وندا جول كارتاسىن قابىلداۋ جونىندە تاپسىرما بەرىلدى»، - دەدى بەردىبەك ساپاربايەۆ.