ەلباسى قاراعاندىلىقتاردى بۇقار جىراۋدىڭ 350 جىلدىعىمەن قۇتتىقتادى
وسىعان وراي، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قاراعاندى وبلىسىنىڭ تۇرعىندارىن مەرەيتويمەن شىن جۇرەكتەن قۇتتىقتادى، دەپ حابارلايدى قازاقپارات ءتىلشىسى قاراعاندى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
قازاقستان پرەزيدەنتى نۇرسۇلتان نازاربايەۆتىڭ سالتاناتتى ءىس- شاراعا قاتىسۋشىلارعا ارنالعان قۇتتىقتاۋ حاتىن ق ر مەملەكەتتىك حاتشىسى گۇلشارا ءابدىحالىقوۆا وقىپ بەردى. وندا بۇقار جىراۋ قيىن- قىستاۋ جىلداردا وتكىر جىرلارىمەن ەلدى ۇيىتىپ، اتا مەكەنىمىزدى جاۋدان قورعاۋعا شاقىرعان كورنەكتى تۇلعا دەلىنگەن. ەلباسى ۇلى بابامىز ارمانداعان ءبىرتۇتاس ۇلت جانە قۋاتتى مەملەكەت قۇرعانىمىزدى تىلگە تيەك ەتىپ، بۇقار جىراۋ مۇراسى ءاردايىم وزەكتى بولىپ قالا بەرەتىنىن جەتكىزدى. سونداي- اق، نۇرسۇلتان نازاربايەۆ ۇلى جىراۋدىڭ شىعارماشىلىعى زامانداستارىمىز بەن كەلەر ۇرپاق ءۇشىن وتە قۇندى ەكەنىن ايتتى.
ەلباسى ءوڭىر تۇرعىندارىن بۇقار جىراۋدىڭ 350 جىلدىق مەرەيتويىمەن قۇتتىقتاپ، جىراۋدىڭ ارمانىندا كەتكەن تاۋەلسىز مەملەكەتتىڭ گۇلدەنۋىن تىلەدى. بۇقار جىراۋ - تاۋكە حاننىڭ تۇسىنداعى ىقپالدى بيلەردىڭ ءبىرى. ۇلى ويشىل ابىلاي حاننىڭ باس كەڭەسشىسى بولىپ، قازاقستان تاريحىندا وشپەس ءىز قالدىرعان.
بۇقار جىراۋ قالقامان ۇلىنىڭ مەرەيتويى قاراعاندى وبلىسىندا جىل بويى اتالىپ وتەدى. وڭىردە كورمەلەر، كونسەرتتەر، جىرشى- جىراۋ فەستيۆالى، ۇلى ويشىلدىڭ شىعارماشىلىعى مەن ومىرىنە ارنالعان عىلىمي كونفەرەنسيالار ءوتىپ ۇلگەردى. نەگىزگى مەرەيتويلىق ءىس- شارالار بۇگىن، 18 - تامىزدا، بۇقار جىراۋ اۋدانىندا وتۋدە.
مەرەكە قارساڭىندا بوتاقارا اۋىلىنا جاقىن ماڭدا كيىز ءۇي قالاشىعى تۇرعىزىلىپ، كوپشىلىككە ارنالعان سەرۋەندەر ۇيىمداستىرىلدى. مەرەيتوي قوناقتارى تانىمال قازاقستاندىق جانە شەتەلدىك جۇلدىزداردىڭ، ق. بايجانوۆ اتىنداعى كونسەرتتىك بىرلەستىك ونەرپازدارىنىڭ قاتىسۋىمەن وتەتىن مەرەكەلىك باعدارلامانى تاماشالايتىن بولادى. سونداي- اق، بۇگىن ۇلتتىق سپورت تۇرلەرىنەن كوپتەگەن جارىستار وتكىزىلۋدە.