استانادا وتەتىن حالىقارالىق ۆولونتەرلەر فورۋمىنا 34 ەلدىڭ دەلەگاتى كەلەدى
«مەملەكەت باسشىسى قاسىم- جومارت توقايەۆتىڭ ۆولونتەرلەردى جۇمىلدىرۋدىڭ حالىقارالىق جىلىن وتكىزۋ جونىندەگى ب ۇ ۇ- نىڭ 75- سەسسياسىندا ايتىلعان باستاماسى اياسىندا ەلىمىزدە جىل سايىن حالىقارالىق دەڭگەيدەگى ءىس- شارالار ۇيىمداستىرۋ ءداستۇرى قالىپتاسقان. بىلتىر ورتالىق ازيا ۆولونتەرلەرىنىڭ فورۋمى وتسە، بيىل 20-21- ماۋسىمدا استانادا حالىقارالىق ۆولونتەرلەر فورۋمىن وتكىزۋ جوسپارلانۋدا»، - دەدى دانيار قادىروۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
فورۋمنىڭ نەگىزگى ماقساتى - ۆولونتەرلەر قوزعالىسىن دامىتۋ جانە قولداۋ سالاسىنداعى قازاقستاندىق تاجىريبەنى تانىستىرىپ، حالىقارالىق ارەنادا ەلدىڭ وڭ ءيميدجىن قالىپتاستىرۋ.
فورۋمعا دايىندىق جۇمىستارى قازاقستانداعى بۇۇ- نىڭ ەرىكتىلەر باعدارلاماسىنىڭ وكىلدىگى، ازياداعى ءوزارا ءىس- قيمىل جانە سەنىم شارالارى جونىندەگى كەڭەس حاتشىلىعى، «ۇلتتىق ۆولونتەرلىك جەلىسى» جانە باسقا دا ۆولونتەرلىك جانە حالىقارالىق ۇيىمدارمەن ارىپتەستىك قارىم- قاتىناستا جۇرگىزىلۋدە.
«بۇل جيىن 34 شەت ەلدىڭ جانە قازاقستاننىڭ بارلىق وڭىرلەرىنىڭ دەلەگاتتارىنىڭ قاتىسۋىمەن وتەتىن ۆولونتەرلىك سالاداعى ءىرى حالىقارالىق شارا بولادى. وعان 400 گە جۋىق ادامنىڭ قاتىسۋى جوسپارلانۋدا، ونىڭ 140 قا جۋىعى شەتەلدىك قاتىسۋشىلار مەن حالىقارالىق ۇيىمداردىڭ وكىلدەرى»، - دەدى د. قادىروۆ.
فورۋمعا قاتىسۋعا قىزىعۋشىلىق تانىتقانداردىڭ كوپتىگىنە جانە ۆولونتەرلەردىڭ ۇسىنىسىنا وراي، وڭىرلىك قاتىسۋشى- ۆولونتەرلەردى ىرىكتەۋ كونكۋرسى وتكەن. وسىلايشا 80 ۆولونتەر وڭىرلىك دەلەگاتتار بولىپ بەلگىلەندى.
ۆولونتەرلەر فورۋمىنىڭ سلوگانى، حەشتەگى مەن لوگوتيپى رەتىندە «ىزگىلىك تەگى» سيمۆولى بەكىتىلگەن. بۇل جىنىسىنا، جاسىنا، ۇلتىنا جانە باسقا دا ەرەكشەلىكتەرىنە قارامايتىن، بارلىق ادامدارعا ءتان «ىزگىلىك تەگى» . فورۋمنىڭ ۇرانى «تەكتەگى ىزگىلىكتى ويات!» دەپ اتالادى.
سونىمەن بىرگە، فورۋم اياسىندا ەلوردادا حالىقارالىق ۆولونتەرلىك ورتالىق اشىلادى. بۇگىننەن باستاپ زەرەندىدە ۆولونتەرلەر، ۆولونتەرلىك ۇيىمداردىڭ جەتەكشىلەرى مەن وڭىرلىك فرونت- وفيستەردىڭ ماماندارىنىڭ قاتىسۋىمەن «ۆولونتەرلەردىڭ جازعى مەكتەبى» ءوز جۇمىسىن باستادى.