ءوزىن بانكروت دەپ جاريالاۋعا 34 مىڭنان استام قازاقستاندىق ءوتىنىش بەردى
«3- ناۋرىزدان باستاپ ازاماتتاردان بانكروت دەپ جاريالاۋ بويىنشا ءوتىنىش قابىلداۋ باستالدى. 31- ناۋرىزداعى جاعداي بويىنشا 34 مىڭنان اسا ءوتىنىش كەلىپ ءتۇستى. وتىنىشتەر نەگىزىنەن eGov.kz ەلەكتروندىق ۇكىمەت پورتالى (%94) جانە e-Salyq Azamat موبيلدى قوسىمشاسى ارقىلى (%6) ءتۇسىپ جاتىر»، - دەدى ەرجان ءبىرجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، «قازاقستان ازاماتتارىنىڭ تولەم قابىلەتىن قالپىنا كەلتىرۋ جانە بانكروتتىق تۋرالى» زاڭ تالاپتارىنا سايكەس 15 جۇمىس كۇن ىشىندە سالىق ورگاندارى ازاماتتىڭ مىنا تالاپتارعا سايكەستىگىن تەكسەرەدى:
- بانك، ميكروقارجى ۇيىمدارى جانە كوللەكتورلىق اگەنتتىكتەر الدىنداعى قارىزى 5,5 ميلليون تەڭگەدەن اسپاۋى كەرەك (1600 ا ە ك)؛
- قارىزدىڭ وتەلمەگەنىنە 12 ايدان اسۋى كەرەك؛
- ورتاق مەنشىكتەگى مۇلىكتى قوسا العاندا، مەنشىك قۇقىعىندا مۇلىك بولماۋى كەرەك (اۆتوكولىك، پاتەر، ءۇي، جەر تەلىمى، بانكتەگى دەپوزيت جانە ت. ب.)؛
- بانكپەن، ميكروقارجى ۇيىمدارىمەن بورىش بويىنشا رەتتەۋ ءراسىمىنىڭ جۇرگىزىلۋى.
«اتاۋلى الەۋمەتتىك كومەكتى 6 اي قاتارىنان الۋشىلار ءۇشىن جانە بەرەشەگى 5 جىلدان ارتىق وتەلمەگەن ازاماتتار ءۇشىن بولەك تەكسەرىس جۇرگىزىلەدى. تەكسەرۋ مەملەكەتتىك ورگاندار، بانكتەر مەن كرەديتتىك بيۋرونىڭ ەلەكتروندىق بازالارىمەن ەسەپ ايىرىسۋ ارقىلى «Qoldau» جەكە تۇلعالاردىڭ بانكروتتىعى اقپاراتتىق جۇيەسىندە اۆتوماتتى تۇردە جاسالادى»، - دەيدى ۆيتسە-مينيستر.
ەسكە سالايىق، 3- ناۋرىزدا ەلىمىزدە بانكروتتىققا ءوتىنىم قابىلداۋ باستالدى.