تارازدا 33 ازامات قايتا قاماۋعا الىندى
جامبىل وبلىسىندا جىل باسىنان بەرى ورىن العان ۇرلىق-قارلىقتىڭ 70-80 پايىزى ەسەپتە تۇرعانداردىڭ قاتىسۋىمەن جاسالعان. قۇزىرلى ورگان تاراپىنان پروباتسيالىق باقىلاۋ ورناتىلعان ازاماتتار اراسىندا قايتا قىلمىس جاساۋدىڭ الدىن الۋ ماقساتىندا كەشەندى ءىس-شارالار جۇرگىزىلىپ جاتقانىمەن، تۇزەلۋ جولىنا تۇسكەندەر قاتارى تىم از. بۇل تۋرالى وڭىردەگى پروباتسيا قىزمەتىنىڭ باستىعى، ادىلەت پودپولكوۆنيگى اسەل كابۋلوۆا ايتىپ بەردى.
«بىلتىر 2 مىڭنان استام سوتتالعان ازامات پروباتسيالىق باقىلاۋدان ءوتتى. ءدال قازىر جامبىل وبلىسى اۋماعىندا 1568 ادام ەسەپتە تۇر. ونىڭ ىشىندە كامەلەتكە تولماعانداردىڭ سانى - 15. بيىل 3 اي ىشىندە ەسەپتە تۇرعانداردىڭ قاتىسۋىمەن 14 قىلمىس ورىن الدى. ونىڭ باسىم بولىگى ۇرلىق-قارلىق فاكتىلەرى.
پروباتسيا قىزمەتكەرلەرى وسى جايتتاردى ەسكەرە وتىرىپ، 100 دەن اسا ماتەريالدى سوتقا جولدادى. وندا ارنايى ەسەپكە الىنسا دا، قايتا قىلمىس جاساعان ازاماتتاردى تۇزەۋ مەكەمەسىنە قاماۋعا الۋ ۇسىنىسى ەنگىزىلدى. سوعان سايكەس، 33 تۇلعاعا قاتىستى ءىس قاناعاتتاندىرىلىپ، ولار قاماۋعا الىندى»، - دەيدى ول.
قۇقىق قورعاۋ ورگاندارى قىزمەتكەرلەرىنىڭ ايتۋىنشا، قاراپايىم حالىقتىڭ ءومىر بويى تىرنەكتەپ جيناعان دۇنيە-مۇلكى مەن مال-جانىنا كوز سالاتىنداردىڭ كوبىسى بۇرىن سوتتى بولعان.
ايتا كەتەيىك، بۇعان دەيىن تارازداعى كلۋبتاردى وزدەرىنىڭ «كۇزەت قىزمەتىن» پايدالانۋعا ماجبۇرلەگەن قىلمىستىق توپ ۇستالعانىن جازعان بولاتىنبىز.