جالاقىنىڭ جاڭا جۇيەسى: استانالىق مەملەكەتتىك قىزمەتكەرلەر 330 مىڭ تەڭگە ەڭبەكاقى الادى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ استانا قالاسى بويىنشا دەپارتامەنتى ارتىق الاڭداردى وڭتايلاندىرۋ ناتيجەسىن باياندادى، دەپ حابارلايدى قازاقپارات ءتىلشىسى.

بۇل جۇمىستار مەملەكەت باسشىسىنىڭ تاپسىرماسى اياسىندا جۇزەگە اسۋدا.

«وتكەن جىلى ەلباسى قازاقستان حالقىنا جولداۋىندا مەملەكەتتىك ورگاندار مەن ازاماتتاردىڭ قارىم- قاتىناسىن نىعايتۋ جانە اشىق تۇردە قىزمەت جاساۋ، ارتىق الاڭداردىڭ بارلىعىن وڭتايلاندىرىپ، قايتا قاراستىرىپ، بيۋدجەتتى ۇنەمدەۋ تۋرالى تاپسىرما بەردى. وسىعان بايلانىستى اگەنتتىكتە العاشقى رەت جالاقىنىڭ جاڭا جۇيەسى ەنگىزىلدى. شتاتتاعى قىزمەتتەردىڭ سانى وڭتايلاندىرىپ، جاقسى جۇمىس ىستەيتىن قىزمەتكەرلەر قالدىرىلدى. سونىڭ ەسەبىنەن باسقا ءتيىمدى جۇمىس ىستەيتىن قىزمەتكەرلەردىڭ جالاقىسى ارتتى»، - دەدى دەپارتامەنت باسشىسى جازيرا جىلقىشييەۆا جۋرناليستەرگە بەرگەن سۇحباتىندا.

ياعني، دەپارتامەنتتەگى 47 قىزمەتكەردىڭ 15- ءى قىسقارتىلىپ، 32 قىزمەتكەر قالعان.

«بۇعان دەيىن ۇنەمدەلگەن قارجى ەسەبىنەن ولاردىڭ جالاقىسىن % 30- كە دەيىن كوتەرگەن بولساق، ەندى تاعى % 50- كە دەيىن ارتتىرۋعا مۇمكىندىك تۋدى. مىسالى، قاتارداعى باس ماماننىڭ جالاقىسى 220 مىڭ بولسا، ونىڭ % 50 - 110 مىڭ تەڭگە قوسىلدى. ناتيجەسىندە جالاقى 330 مىڭعا دەيىن كوبەيدى»، - دەدى ج. جىلقىشييەۆا.

ودان بولەك، وتە ءتيىمدى جۇمىس ىستەگەن قىزمەتكەرلەردىڭ % 50 دەيىن ۇستەمەاقى الۋ مۇمكىندىگى بار.

دەپارتامەنت بيىل ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ 16-قاباتىنا كوشتى. بۇل دا ەداۋىر قاراجات ۇنەمدەۋگە سەپتىگىن تيگىزگەن.

«وزدەرىڭىز كورىپ وتىرعانداي، جاڭا كەڭسەدە قىزمەتكەرلەر اشىق كەڭىستىكتە جۇمىس ىستەپ جاتىر. دەپارتامەنت باسشىسىنىڭ ورىنباسارلارى، ءوز باسقارمالارى مەن قاتارداعى قىزمەتكەرلەرى ءبىر الاڭدا جۇمىس ىستەيدى. بۇل - جاڭا فورماتتاعى جۇمىس مودەلى»، - دەدى ج. جىلقىشييەۆا.

اۆتور: ايجان سەرىكجان قىزى