ەلىمىزدە تۇرمەدە وتىرعان 33 مىڭ ادامنىڭ 20 پايىزى كىسى ولتىرگەنى ءۇشىن سوتتالعان

نۇر- سۇلتان. قازاقپارات - قازاقستانداعى 80 قىلمىستىق اتقارۋ مەكەمەسىندە 33 مىڭ سوتتالۋشى قاماۋدا وتىر. بۇل تۋرالى ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ باسقارما باستىعى بيبىگۇل مۇڭايتپاسوۆا ايتتى، دەپ حابارلايدى قازاقپارات ءتىلشىسى.

«ەلىمىزدىڭ قىلمىستىق اتقارۋ جۇيەسىندە 80 مەكەمە بار. ونىڭ 64- ءى باس بوستاندىعىنان ايىرۋ تۇرىندەگى قىلمىستىق جازاسىن اتقارۋشىلارعا ارنالسا، 16-سى - تەرگەۋ يزولياتورى»، - دەيدى كوميتەت وكىلى مينيسترلىكتىڭ اقپارات الاڭىندا.

قىلمىستىق اتقارۋ جۇيەسى كوميتەتىنىڭ باسقارما باستىعى قاماۋدا وتىرعانداردىڭ ساناتى مەن قۇرامىنا دا توقتالدى.

«بۇل مەمەكەلەردە 33 مىڭ ادام قاماۋدا وتىر. بۇلاردىڭ 4700- ءى - تەرگەۋگە الىنعاندار. سوتتالعانداردىڭ نەگىزگى بولىگى، ياعني، 94 پايىزى اۋىر جانە اسا اۋىر قىلمىس جاساعانى ءۇشىن جازاسىن وتەپ جاتىر. سانات بويىنشا ايتساق، 47 پايىزدايى بۇرىن دا سوتتالعان. 20 پايىزعا جۋىعى كىسى ولتىرگەنى ءۇشىن، 12,5 پايىزى توناۋمەن اينالىسقانى ءۇشىن، 11,5 پايىزى ەسىرتكى ساتقانى ءۇشىن سوتتالعان. قىلمىستاردىڭ 13,8 پايىزى جىنىستىق قول سۇقپاۋشىلىققا قارسى تىركەلگەن. ونىڭ ىشىندە 7 پايىزى كامالەتكە تولماعاندار جانە وزگەلەرگە قاتىستى جاسالعان»، - دەدى بيبىگۇل مۇڭايتپاسوۆا.

اۆتور: ەسىمجان ناقتىباي