قوستاناي وبلىسىنان ماڭعىستاۋعا 32 ميلليون تەڭگەگە تەگىن مال ازىعى اكەلىنەدى

ماڭعىستاۋ. قازاقپارات - ماڭعىستاۋ وبلىسىنىڭ اكىمدىگى مەن «ولجا اگرو» ج ش س- گى اراسىندا مال ازىعىن تەگىن جەتكىزۋ بويىنشا مەموراندۋمعا قول قويىلدى، دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

ماڭعىستاۋ وبلىسىندا قۋاڭشىلىقتان قينالعان شارۋالارعا كومەك بەرۋ شارالارى جالعاسۋدا. وبلىس اكىمدىگىمەن كەلىسىم اياسىندا «ولجا اگرو» ج ش س ماڭعىستاۋ وبلىسىنا قۇرعاقشىلىقتان زارداپ شەككەن مال يەلەرىنە كومەك رەتىندە جالپى قۇنى 32 ميلليون تەڭگە بولاتىن 250 توننا ءشوپ جانە 180 توننا جەم جەتكىزەدى.

سونىمەن قاتار، قول قويىلعان مەموراندۋم اياسىندا «ولجا اگرو» ج ش س وڭىرگە مال ازىعىن نارىقتاعىدان تومەن باعامەن جەتكىزەتىن بولادى. وبلىس اكىمى نۇرلان نوعايەۆ تۇرعىندار اراسىندا جەم-ءشوپتى جەتكىزۋ مەن ءبولۋدىڭ اشىق تەتىگىن ۇيىمداستىرۋ جونىندە ءبىرقاتار ناقتى تاپسىرمالار بەردى. بۇل جۇمىسقا جەرگىلىكتى اتقارۋشى ورگاننىڭ اتىنان وبلىس اكىمىنىڭ ورىنباسارى عالىمجان نيازوۆ جاۋاپتى بولىپ، مەموراندۋمعا قول قويدى.

«ولجا اگرو» ج ش س تاراپىنان كومپانيانىڭ باس ديرەكتورى ايداربەك حوجانازاروۆ قول قويدى.