ا ق ش ازاماتتارى اسىراپ العان 32 قازاق بالاسى ەلورداعا كەلدى

نۇر-سۇلتان. قازاقپارات - تۋعان توپىراققا تابان تىرەپ، تاريحي وتاندى كورۋ. ا ق ش ازاماتتارى اسىراپ العان 32 قازاق بالاسى ەلورداعا كەلدى. ەندى ولار الداعى 10 كۇن بويى كىندىك قانى تامعان جەردە اسىر سالادى.

ءارى اتا- تەگىمەن تانىسىپ، سالت- ءداستۇرى مەن مادەنيەتىنە تەرەڭنەن بويلاي الادى. بۇل - وسىدان 10-15 جىل بۇرىن ەلىمىزدە دۇنيەگە كەلىپ، كەيىن شەتەل اسقان بالالار. ەسەيىپ، بوي جەتكەن شاقتارىندا تاريحي وتاندارىنا ورالىپ وتىر.

الايدا تۋعان ولكەسىمەن تەك تانىسۋ ءۇشىن. جات جەردە ءارى جات باۋىردا وسكەندىكتەن، ءون بويلارىنان قازاقىلىق تا بايقالا بەرمەيدى.

ەريك ستيللوۋ:

- امەريكا قۇراما شتاتتارى - مەنىڭ قازىرگى وتانىم. وندا ءبىلىم الامىن، سۇيىكتى ىستەرىممەن اينالىسامىن. ا ق ش- تاعى وتباسىم مەن دوستارىما ماعان بەرگەن كومەكتەرى ءۇشىن العىسىم شەكسىز. ءبىراق وسىندا كەلگەن ساتىمدە تابيعات، مادەنيەت، سالت- ءداستۇر جانە ءتىل ءبارى- ءبارى ماعان وتە جاقىن بولىپ كورىندى.

ەريك ستيللوۋ - ا ق ش- تان تاريحي وتانىنا كەلگەن 32 بالانىڭ ءبىرى. ولارعا 10 كۇن بويى ەلىمىزدىڭ باس قالاسى مەن الماتىنى ارالاۋ جانە تۋعان ولكەلەرىنە تابان تىرەۋ مۇمكىندىگى بەرىلىپ وتىر. نارەستە كەزدەرىندە ولاردى باۋىرىنا باسقان اتا- انالارى دا قاسىندا.

ليندي فروليك، ا ق ش ازاماتى:

- قازاقستاندا وسىدان 14 جىل بۇرىن بولدىم. زەيندى سول كەزدە الىپ كەتكەن ەدىم. ونى 2005 -جىلى سەمەي قالاسىندا اسىراپ الدىق. 5 جارىم ايلىق كەزىندە باۋىرىمىزعا باستىق. وعان دەيىن قىتايدان دا ءبىر بالانى قامقورلىققا العان بولاتىنبىز. زەيندى العاش قولىما العان كەزىم ءالى ەسىمدە. سول ساتتە- اق ونىڭ ماعان بوتەن بولمايتىنىن سەزدىم.

ا ق ش ازاماتتارى قازاقستاندىق 6 مىڭعا جۋىق بالانى اسىراپ العان. ەۋروپا ەلدەرىندە دە 3 مىڭعا تارتا بالعىن بار. كەيبىرى وسى ۋاقىتقا دەيىن تاريحي وتاندارىندا بولىپ قايتتى.

«Ties Program» اتتى باعدارلاما اياسىندا ولارعا وسىنداي جاعداي جاسالعان. ەلىمىزدىڭ سىرتقى ىستەر مينيسترلىگى دە بۇل ىسكە سەپ بولىپ وتىر.

ساكەن حاميدۋللين، ق ر س ءى م كونسۋلدىق قىزمەت ديرەكتورىنىڭ ورىنباسارى:

- ولاردىڭ قازاق ەكەنىن ۇمىتتىرماۋ ءۇشىن وسىنداي شارالار ۇيىمداستىرامىز. بالكىم، كەلەشەكتە بۇل بالالار ەكى مەملەكەتتىڭ اراسىن جاقىنداستىرۋعا ءوز ۇلەستەرىن قوسۋى مۇمكىن.

جالپى قازاق بالالارىنىڭ شەتەل اسىپ، جات- جۇرتتىق اتانۋى - وزەكتى ورتەيتىن جايتتىڭ ءبىرى. كوپتەگەن قوعام بەلسەندىلەرى وسى ماسەلەگە الاڭداۋشىلىق ءبىلدىرىپ تە ءجۇر. دەگەنمەن قازىر شەتەل ازاماتتارىنىڭ قامقورلىعىنا بەرىلگەن بالالار سانى ازايىپ كەلەدى. ال ەلىمىزدەگى جالپى اتا- انا قامقورلىعىنسىز قالعان بۇلدىرشىندەر سانى - 26 مىڭ. 5 مىڭى - بالالار ءۇيىنىڭ تاربيەسىندە.

ماحاببات بەگالينا، ق ر ب ع م بالالار قۇقىعىن قورعاۋ كوميتەتى باسقارماسىنىڭ باسشىسى:

- قازىرگى تاڭدا بالالاردى اسىراپ الۋ نيەتىمەن ءوتىنىش بىلدىرگەندەر سانى 3 مىڭنان اسادى. جەتىمدەردى ەلىمىزدە قالدىرۋ ءۇشىن قازاقستاندىق وتباسىلارعا ءبىراز جەڭىلدىك ۇسىنامىز.

قازاق - جەتىمىن جىلاتپاعان، جەسىرىن قاڭعىتپاعان حالىق. الايدا وسى ءتامسىلدى بۇگىنگى قوعامعا قاراتا ايتۋ قيىن. دەمەك، مەملەكەت سول ولقىلىقتىڭ ورنىن تولتىرۋى قاجەت. بيىل ەلىمىزدە بالالاردى اسىراپ الۋ جونىندەگى ۇلتتىق اگەنتتىك قۇرىلادى. ءسويتىپ، وسى قۇرىلىم قاراكوزدەرىمىزدىڭ ءوز وتانىندا قالىپ، ءوسىپ- جەتىلۋىنە جاعداي جاساۋى ءتيىس.

www.24.kz