14:43, 30 - ماۋسىم 2022 | GMT +6
قازاقستاندا زاڭسىز جۇرگەن 322 شەتەل ازاماتى ەلدەن شىعارىلدى
نۇر- سۇلتان. قازاقپارات - شەتەلدىكتەردىڭ قازاقستاندا بولۋ ەرەجەلەرىن ورىنداۋدى قامتاماسىز ەتۋ ماقساتىندا 27- ماۋسىم مەن 4- شىلدە ارالىعىندا ەل بويىنشا «نەلەگال-2022» جەدەل- الدىن الۋ ءىس- شاراسى ءوتىپ جاتىر.
ق ر ىشكى ىستەر مينيسترلىگى تاراتقان دەرەكتەرگە قاراعاندا، پوليتسيا شارا شەتەلدىكتەردىڭ كوپ تۇراتىن جەرلەرىنە، قۇرىلىس نىساندارىنا، بازارلارعا، ۇيىمداردىڭ جانە شەتەلدىكتەردىڭ جالدامالى ەڭبەگىن زاڭسىز پايدالاناتىن جۇمىس بەرۋشىلەرگە تەكسەرۋ جۇرگىزەدى، سونداي- اق اۆتوكولىك قۇرالدارىن تەكسەرەدى.
وپەراتسيانىڭ ەكى كۇنىندە كوشى- قون زاڭناماسىنىڭ 3762 رەت بۇزىلعانى انىقتالدى. سونداي- اق شەتەلدىكتەردىڭ ەڭبەك قىزمەتىن زاڭسىز جۇزەگە اسىردىڭ 1 239 جاعدايى انىقتالىپ، 207 جۇمىس بەرۋشى شەتەلدىكتەردىڭ ەڭبەگىن رۇقساتسىز پايدالانعان. ال شەتەلدىكتەردىڭ كەلۋى تۋرالى ىشكى ىستەر ورگاندارىن ۋاقىتىلى حاباردار ەتپەۋ جانە ەلدە بولۋ ەرەجەلەرىن بۇزۋ فاكتىلەر 1509. سوتتاردىڭ شەشىمى بويىنشا ەلدەن 322 شەتەل ازاماتى شىعارىلدى.