پارلامەنتكە 31 زاڭ جوباسى ەنگىزىلەدى - ۇكىمەت
بۇل تۋرالى ق ر ادىلەت ءمينيسترى مارات بەكەتايەۆ ايتتى، دەپ حابارلايدى قازاقپارات ءتىلشىسى. «2022 -جىلعا ارنالعان ۇكىمەتتىڭ زاڭ جوبالاۋ جۇمىستارى جوسپارىنىڭ جوباسىندا 31 زاڭ جوباسىن ازىرلەۋ كوزدەلگەن. ونىڭ ىشىندە ءبىرىنشى جارتىجىلدىقتا پارلامەنتكە - 11 زاڭ جوباسىن جانە ەكىنشى جارتىجىلدىقتا 20 زاڭ جوباسىن ەنگىزۋ قاجەت. جالپى، جوسپار جوباسى پرەزيدەنت پەن مەملەكەتتىڭ ستراتەگيالىق قۇجاتتارىندا ايقىندالعان مىندەتتەر نەگىزىندە ازىرلەندى»، - دەدى مينيستر بۇگىن ۇكىمەت وتىرىسىندا.
ماسەلەن، ونىڭ اتاپ وتۋىنشە، «قازاقستان رەسپۋبليكاسىنىڭ الەۋمەتتىك كودەكسى»، «كاسىبي بىلىكتىلىكتەر تۋرالى» جانە «اگلومەراتسيالاردى دامىتۋ تۋرالى» زاڭ جوبالارىن ازىرلەۋ مەملەكەت باسشىسىنىڭ وسى جىلعى 1-قىركۇيەكتەگى جولداۋىن ىسكە اسىرۋ جونىندەگى جالپىۇلتتىق ءىس- شارالار جوسپارىنان تۋىندايدى.
«بۇدان باسقا، تۇتىنۋشىلاردىڭ قۇقىقتارىن قورعاۋ، سايكەستىكتى باعالاۋ جانە جىلۋ ەنەرگەتيكاسىنا قاتىستى جاڭا زاڭ جوبالارىن ازىرلەۋ جوسپارلانۋدا. «قۇقىقتىق اكتىلەر تۋرالى» زاڭعا سايكەس جوسپاردىڭ جوباسى مەملەكەت باسشىسىمەن كەلىسۋگە جاتادى. جوسپار جوباسىن پرەزيدەنت اكىمشىلىگىنە جىبەرۋ ۇسىنىلادى»، - دەدى مارات بەكەتايەۆ.
اۆتور: مارلان جيەمباي