كوروناۆيرۋس: توتەنشە جاعداي رەجيمى 31- قازانعا دەيىن ۇزارتىلۋى مۇمكىن

ريم. انسا - قازاقپارات - كوروناۆيرۋس ينفەكتسياسىنا بايلانىستى يتاليادا ەنگىزىلگەن توتەنشە جاعداي رەجيمى بيىلعى 31- قازانعا دەيىن ۇزارتىلۋى مۇمكىن، دەپ حابارلايدى قازاقپارات ANSA اگەنتتىگىنە سىلتەمە جاساپ.

ىندەتكە قاتىستى احۋالعا وراي يتاليا ۇكىمەتى توتەنشە جاعدايدى سوزۋ ماسەلەسىن قاراستىرۋدا.

ۇكىمەتتەگى دەرەككوزدەردىڭ مالىمەتىنشە، بۇل ۇسىنىس وسى اپتادا وتەتىن مينيسترلەر كابينەتىنىڭ وتىرىسىندا ەنگىزىلەدى.

يتاليادا وتكەن جەكسەنبى كۇنى كوروناۆيرۋستى جۇقتىرۋ بويىنشا جاڭادان 234 جاعداي تىركەلدى.

دۇيسەنبى كۇنى كورسەتكىش ءسال تومەندەدى - 169 جاعداي. بۇگىنگە دەيىن ەلدە ۆيرۋستان 34967 ادام قايتىس بولدى.

جالپى COVID-19 دياگنوزى 243230 ادامعا قويىلدى. بۇل سانعا جازىلىپ شىققاندار، قايتىس بولعاندار جانە ەم-دومىن جالعاستىرىپ جاتقاندار ەنگىزىلگەن.