بيىل تەرروريزمگە قاتىسى بار 31 شەتەلدىك ۇستالدى - ق ر ۇلتتىق قاۋىپسىزدىك كوميتەتى

None
None
نۇر-سۇلتان. قازاقپارات – ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى نۇرعالي بىلىسبەكوۆ 2019 -جىلى تەرروريزم مەن ەكسترەميزيمگە قاتىسى بار 31 شەتەلدىكتىڭ ۇستالعانىن ءمالىم ەتتى، دەپ حابارلايدى قازاقپارات ءتىلشىسى.

«وڭىرلىك تەرروريزمگە قارسى قۇرىلىمنىڭ اياسىندا تاراپتاردىڭ شەكارا قىزمەتتەرى ءوزارا بايلانىستا ارەكەت ەتەدى. تۇراقتى تۇردە جىل سايىن، ءار توقسان سايىن وسى قىزمەتتەردىڭ ساراپشىلار توبى جينالىپ، قاجەتتى شەشىمدەر شىعارادى. جىلدا ەڭ كەمى ءبىر رەت شەكارا ۆەدومستۆولارىنىڭ باسشىلارى باس قوسىپ، وتىرىس وتكىزەدى. وتىرىستا قاجەتتى شەشىم قابىلداپ، ول شەشىمدەر جۇزەگە اسىرىلادى. بۇل تاجىريبە «ىنتىماقتاستىق» دەگەن بىرلەسكەن شەكارا وپەراتسياسى ارقىلى اتقارىلادى. وسى 2019 -جىلى قازاقستاننىڭ شەكارا قىزمەتكەرلەرى ىزدەۋدە جۇرگەن 10 شەتەلدىكتى ۇستاپ، ءوز ەلدەرىنە قايتاردى»، - دەپ توقتالدى نۇرعالي بىلىسبەكوۆ پارلامەنت ءماجىلىسىنىڭ جالپى وتىرىسىندا.

بۇدان بولەك ول ۇ ق ك-نىڭ ىزدەۋ جۇمىستارىنىڭ ناتيجەسى تۋرالى ايتتى.

«سونىمەن قاتار، ۇلتتىق قاۋىپسىزدىك كوميتەتى جەدەل ىزدەۋ جۇمىسىن ۇيىمداستىرادى. وسى جۇمىستىڭ بارىسىندا 2019 -جىلى تەرروريزم مەن ەكسترەميزيمگە قاتىسى بار 31 شەتەلدىكتى ۇستادىق جانە ولار ەلدەرىنە قايتارىلدى»، - دەيدى ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى.

بۇدان بۇرىن حابارلانعانداي، پارلامەنت ءماجىلىسىنىڭ جالپى وتىرىسىندا «شاڭحاي ىنتىماقتاستىق ۇيىمىنىڭ ەكسترەميزمگە قارسى ءىس-قيمىل جونىندەگى كونۆەنسياسىن راتيفيكاتسيالاۋ تۋرالى» زاڭ جوباسى ماقۇلداندى.

قۇجاتتا ش ى ۇ ەلدەرىنىڭ اۋماعىندا ەكسترەميستىك ۇيىمداردى كىرگىزبەۋدىڭ قادامدارى ايقىندالدى.

اۆتور: رۋسلان عابباسوۆ

سوڭعى جاڭالىقتار