دارىگەر تاپشىلىعى: 31 مىڭ مامان جۇمىستان شىعىپ، 1200 دارىگەر شەتەلگە كەتكەن
«مەديتسينا ماماندارى تاپشىلىعىنىڭ نەگىزگى سەبەبى - قىزمەتكەرلەردىڭ ءبىر ورىندا تۇراقتاماۋى بولىپ وتىر. ويتكەنى، ەڭبەكاقى تولەۋ جۇيەسى تولىق جەتىلمەگەن، مەديتسينا قىزمەتكەرلەرىن ىنتالاندىرۋ، قۇقىقتىق قورعاۋ مەن الەۋمەتتىك قولداۋ دا وتە تومەن. بيىلعى 10 - قازاندا جۇرگىزىلگەن زەرتتەۋگە سايكەس، ءبىر جىلدا 31129 مەدقىزمەتكەر (دارىگەرلەر مەن ورتاشا مەديتسينالىق قىزمەتكەرلەر) جۇمىستان شىققان. بۇل كورسەتكىش بىلتىرعىدان % 9,3 تومەن»، - دەدى ق. توسەكبايەۆ ورتالىق كوممۋنيكاتسيالار ورتالىعىندا وتكەن ونلاين بريفينگتە.
جۇمىستان شىعۋدىڭ نەگىزگى سەبەپتەرى رەتىندە قىزمەتكەردىڭ ءوتىنىشى، تاراپتاردىڭ كەلىسىمى، شتاتتىڭ قىسقارۋى جانە باسقا دا جايتتار كورسەتىلگەن. باسقا جايتتار اراسىندا ماماننىڭ قايتىس بولۋى، اۋرۋعا ۇشىراۋى، مۇگەدەكتىك جانە زەينەت جاسىنا شىعۋ سەبەپتەرى بار.
سىرتقى ميگراتسيا بويىنشا شىعىس قازاقستان، سولتۇستىك قازاقستان جانە قاراعاندى وبلىستارى كوش باستاپ تۇر. 2019 -جىلى مەديتسينالىق ءبىلىمى بار 1212 مامان قازاقستان اۋماعىنان كوشىپ كەتكەن. ولاردىڭ كوشۋىنىڭ باستى سەبەپتەرى - ءتيىمدى ىنتالاندىرۋ تاسىلدەرىنىڭ بولماۋى، پسيحوەموتسيالىق جۇكتەمە، كاسىبي دامۋ مۇمكىندىكتەرىنىڭ بولماۋى، قۇقىقتارىنىڭ تومەن دارەجەدە قورعالۋى جانە الەۋمەتتىك كەپىلدىكتەردىڭ بولماۋى. سونىمەن بىرگە، مەديتسينالىق ءبىلىمى بار مامانداردىڭ ىشكى ميگراتسياسىنا 11278 ادام قاتىسقان. اسىرەسە، تۇركىستان وبلىسى مەن نۇر- سۇلتان، الماتى قالالارىنا مەديتسينالىق ماماندار كوپتەپ اۋىسقان.
ايتا كەتەيىك، قازاقستاندا 4122 شتاتتىق ورىنعا دارىگەرلەر قاجەت. اسىرەسە، انەستەزيولوگ- رەانيماتولوگ، تەراپيەۆت، جالپى پراكتيكالىق دارىگەر، زەرتحاناشى دارىگەر، اكۋشەر- گينەكولوگ، ينفەكسيالىق دارىگەرلەر جەتىسپەي جاتىر. ورتا مەديتسينالىق قىزمەتكەرلەر اراسىندا 8583 بوس شتاتتىق ورىن بار.
اۆتور: ايجان سەرىكجان قىزى