بيداي ەكسپورتتايتىن 30 ەلدىڭ اراسىندا قازاقستان عانا تەڭىزگە شىعا المايدى - مينيستر

استانا. قازاقپارات - استانا حالىقارالىق فورۋمىنا قاتىسقان اۋىل شارۋاشىلىعى ءمينيسترى ەربول قاراشوكەيەۆ اگروونەركاسىپ كەشەنىن دامىتۋ تۇجىرىمداماسىنىڭ باسىم باعىتتارىن اتادى، دەپ حابارلايدى قازاقپارات ءتىلشىسى.

«اگروونەركاسىپ كەشەنىن دامىتۋ تۇجىرىمداماسىنىڭ باستى ماقساتى - ەكسپورت كولەمىن 2 ەسە ارتتىرۋ. كەيىنگى ەكى جىل قاتارىنان بۇل باعىتتا ءوسىم بار. ماسەلەن، بيداي توڭىرەگىندەگى پروبلەماعا ەرەكشە توقتالايىن. الەمدە بيداي ەكسپورتتايتىن 30 ەل بار. بۇل رەتتە مەن قىزىق دەرەك كەلتىرگىم كەلەدى - وسى 30 مەملەكەتتىڭ ىشىندە قازاقستان تەڭىزگە شىعا المايتىن جالعىز ەل. سوندىقتان ءبىز ەكسپورت كولەمىن بىردەن كوتەرەمىز دەپ ايتا المايمىن. سەبەبى وزگە الەم ەلدەرىنىڭ بيدايدى تەڭىز ارقىلى تاسىمالداۋ مۇمكىندىگى بار. ونى دا ەسكەرۋ ورىندى دەپ سانايمىن»، - دەدى ەربول قاراشوكەيەۆ.

ءمينيستردىڭ سوزىنشە، تەڭىز ارقىلى ەكسپورتتالاتىن بيدايدىڭ قۇنى ارزان. ال كولىك نەمەسە تەمىرجولمەن تاسىمالدانعان تاۋاردىڭ باعاسى شىعىننىڭ كوپ بولۋىنا بايلانىستى الدەقايدا قىمباتقا تۇسەدى.

ەربول قاراشوكەيەۆ بۇگىنگى فورۋم بارىسىندا اتاپ وتكەندەي، بىلتىر اۋىل شارۋاشىلىعى سالاسىنىڭ نەگىزگى كاپيتالىنا 2 ميلليارد دوللار ينۆەستيتسيا تارتىلعان. سونداي- اق، ازىق- تۇلىك تاۋارلارىنىڭ ءوندىرىسى % 4 ارتىپ، 6,5 ميلليارد دوللارعا جەتتى.