قازاقستاندىقتاردىڭ دەپوزيتتەرىندە 30 تريلليون تەڭگەگە ساقتاۋلى
«2022-جىلى تەڭگەلىك اكتيۆتەردى قورعاۋ ماقساتىندا قازاقستاننىڭ دەپوزيتتەرگە كەپىلدىك بەرۋ قورى ۇسىنعان حالىقتىڭ تەڭگەدەگى سالىمدارى بويىنشا شەكتى مولشەرلەمەلەر كوتەرىلدى. بۇعان دەيىن قور 2022-جىلعى قاڭتاردان باستاپ كەپىلدىكتىڭ ەڭ جوعارى سوماسىن 20 ميلليون تەڭگەگە دەيىن ارتتىرعان بولاتىن. 2022-جىلعى اقپاندا قازاقستان ۇلتتىق بانكى ۇكىمەتپەن بىرلەسىپ جەكە تۇلعالاردىڭ دەپوزيتتەرى بويىنشا بيۋجەت قاراجاتى ەسەبىنەن تەڭگەمەن وتەماقى (سىيلىقاقى) ەسەپتەۋدى كوزدەيتىن تەڭگەلىك سالىمداردى قورعاۋ باعدارلاماسىن جاريالادى»، - دەپ اتاپ ءوتتى ۇلتتىق بانك باسپا ءسوز قىزمەتىنەن اگەنتتىك ءتىلشىسىنىڭ ساۋالىنا وراي.
قابىلدانعان ءىس-شارالار حالىقتىڭ تەڭگەدەگى دەپوزيتتەرىنىڭ قىسقارۋىنا جول بەرمەۋگە، ەكىنشى دەڭگەيلى بانكتەردىڭ قورلاندىرۋ بازاسىن تۇراقتاندىرۋعا، دوللارلاندىرۋدى جانە ايىرباس باعامىنا قىسىمدى تومەندەتۋگە مۇمكىندىك بەردى.
«وسىلايشا، دەپوزيتتەردى دوللارلاندىرۋ ءبىر جىل ىشىندە 38,4 پايىزدان (2022-جىلدىڭ اقپانىنان باستاپ) 30 پايىزعا دەيىن تومەندەدى. ال 2023-جىلى اقپانداعى دەپوزيتتەر 30 تريلليون تەڭگەگە جەتتى. ۆاليۋتا نارىعىنىڭ تەپە-تەڭدىگىن جاقسارتۋعا ەركىن وزگەرمەلى ايىرباس باعامى رەجيمىن ۇستانۋ دا ىقپال ەتتى. باعامنىڭ ەكىجاقتى قۇبىلمالىلىعى نارىق قاعيداتتارىنىڭ ودان ءارى كەڭەيۋىن، ۆاليۋتالىق ساۋدانى نارىقتاندىرۋدى ايعاقتايدى. تۇتاستاي العاندا، تەڭگەلىك اكتيۆتەرگە دەگەن سەنىمنىڭ ارتۋىنا قاراي حالىقتىڭ مىنەز-قۇلىق مودەلىن تۇتىنۋشىدان جيناق مودەلىنە اۋىستىرۋ ىنتالاندىرىلادى. بۇل ينفلياتسيالىق قىسىمنىڭ تومەندەۋىنە ىقپال ەتەتىن بولادى»، - دەدى ۇلتتىق بانكتەن.