قازاقستاندىقتار وزبەكستاندا 30 كۇن تىركەۋسىز جۇرە الادى
وزبەكستاننىڭ سىرتقى كوشى-قون اگەنتتىگىنىڭ حابارلاۋىنشا، «ازاماتتاردىڭ ءوزارا ساپارلارىنىڭ شارتتارى تۋرالى» ۇكىمەتارالىق كەلىسىمگە ەكى ەل ازاماتتارىنىڭ كەلۋ، بولۋ جانە كەتۋ تارتىبىنە قاتىستى تۇزەتۋلەر ەنگىزىلگەن.
«ءبىر تاراپ مەملەكەتىنىڭ ازاماتتارى، ەگەر ولاردىڭ بولۋ مەرزىمى كۇنتىزبەلىك 30 كۇننەن، ال جالپى العاندا - 180 تاۋلىكتىڭ ءاربىر كەزەڭىندە بارلىعى 90 كۇننەن اسپاسا، ەكىنشى تاراپ مەملەكەتىنىڭ اۋماعىنا ۋاقىتشا تۇرۋعا ىقتيارحات (ۋاقىتشا تىركەۋگە ىقتيارحات) بەرمەي-اق كىرەدى، شىعادى، ترانزيتپەن جۇرەدى. مەملەكەتتىك شەكارانى كەسىپ وتكەن ساتتەن باستاپ كۇنى ەسەپتەلەدى»، - دەلىنگەن ۆەدومستۆو حابارلاماسىندا.
بۇدان بۇرىن حابارلانعانداي، 2022-جىلعى قاراشادا قازاقستان رەسپۋبليكاسى مەن وزبەكستان رەسپۋبليكاسى ىشكى ىستەر مينيسترلىكتەرى ەكى ەل ۇكىمەتتەرى اراسىنداعى ازاماتتاردىڭ ءوزارا ساپارلارى شارتتارى تۋرالى وزگەرىستەر ەنگىزدى. ولار ىشكى راسىمدەر اياقتالعان سوڭ كۇشىنە ەنۋى ءتيىس.