قازاقستان مەن ماجارستان اراسىنداعى ساۋدا اينالىمى ءبىر جىلدا 30 پايىزعا ارتتى
الىبەك قۋانتىروۆ ءوز سوزىندە قازاقستان ماجارستانمەن ەكونوميكالىق قاتىناستى جوعارى باعالايتىنىن اتاپ ءوتتى.
«ق ر ماجارستاندى ەۋروپالىق وداقتاعى ماڭىزدى پەرسپەكتيۆالىق ارىپتەس رەتىندە قاراستىرادى. بۇگىنگى تاڭدا ەلدەرىمىز اراسىندا تۇراقتى جانە قارقىندى دامىپ كەلە جاتقان ساۋدا-ەكونوميكالىق بايلانىس قالىپتاسقانىن سەنىممەن ايتا الامىز»، - دەدى ول.
2022-جىلعى قاڭتار-قاراشادا قازاقستان مەن ماجارستان اراسىنداعى ساۋدا كولەمى %29,1 ءوسىپ، $158,7 ميلليون قۇرادى.
«بىزدە ىنتىماقتاستىقتى دامىتۋدىڭ زور الەۋەتى بار. اتاپ ايتقاندا، قارجى سالاسىندا، ونىڭ ىشىندە «استانا» حالىقارالىق قارجى ورتالىعىندا، اۋىل شارۋاشىلىعى، ەنەرگەتيكا، جۇك-جولاۋشىلار اۋە تاسىمالى، IT، ەكولوگيا، گۋمانيتارلىق سالادا ايتارلىقتاي پەرسپەكتيۆالاردى كورىپ وتىرمىز»، - دەدى مينيستر.
سونداي-اق، ۇ ە م باسشىسى قازاقستانداعى اعىمداعى ەكونوميكالىق جاعداي تۋرالى ايتىپ بەردى.
«سىرتقى جاعىمسىز فاكتورلارعا قاراماستان 2022-جىلى ەل ەكونوميكاسى %3,1- عا ءوستى. وتكەن جىلعى قاڭتار-قاراشادا سىرتقى ساۋدا اينالىمى %34 ارتىپ، $122,2 ميلليارد قۇرادى»، - دەپ ناقتىلادى ءا. قۋانتىروۆ.
مينيستر ينۆەستيتسيالىق احۋالدى جاقسارتۋ بويىنشا جۇرگىزىلىپ جاتقان جۇمىسقا جەكە توقتالدى.
«قولدانىستاعى زاڭناما شەڭبەرىندە ينۆەستورلارعا مەملەكەتتىك قولداۋدىڭ كەڭ شارالارى - سالىقتىق جەڭىلدىكتەر، كەدەندىك باجداردان بوساتۋ تۇرىندەگى پرەفەرەنتسيالار، زاتتاي گرانت بەرىلەدى. 73 ەلدىڭ ازاماتتارى قازاقستانعا ۆيزاسىز كىرە الادى. ماجارستان وسى ەلدەردىڭ قاتارىندا. بيىل قازاقستان جاھاندىق باسەكەگە قابىلەت رەيتينگىندە توپ-43 ەلدىڭ قاتارىنا ەندى. ۇكىمەت ق ر ينۆەستيتسيالىق ساياساتىنىڭ 2026-جىلعا دەيىنگى تۇجىرىمداماسىن قابىلدادى. ول ينۆەستيتسيا تارتۋ ساياساتىن قايتا قاراۋ جونىندەگى شارالار كەشەنىن كوزدەيدى»، - دەپ قورىتىندىلادى ۇلتتىق ەكونوميكا ءمينيسترى.
ىسكەرلىك كەڭەس الاڭىندا ۇەم باسشىسى ءبىرقاتار ەكىجاقتى كەزدەسۋلەر وتكىزدى.
كەلىسسوز بارىسىندا ق ر ۇلتتىق ەكونوميكا ءمينيسترى الىبەك قۋانتىروۆ پەن ماجارستاننىڭ قارجى ءمينيسترى ميحاي ۆارگا ىنتىماقتاستىق ماسەلەلەرىن تالقىلادى.
اتاپ ايتقاندا، ءوزارا تاۋار اينالىمىن ارتتىرۋ، ينۆەستيتسيا كولەمىن ۇلعايتۋ جانە ءبىلىم بەرۋدى دامىتۋ ماسەلەلەرى قاراستىرىلدى.
سونداي اق، ءا. قۋانتىروۆ ماجارستاننىڭ ەكونوميكالىق دامۋ مينيسترلىگى وندىرىستىك ساياسات جانە تەحنولوگيالار جونىندەگى مەملەكەتتىك حاتشىسى گەرگەي فابيانمەن كەزدەستى.
تاراپتار ەكونوميكالىق رەفورمالار، تاريفتىك ساياسات جانە كاسىپكەرلىكتى دامىتۋعا قاتىستى پىكىر الماستى.