اسكەرگە بارۋدان جالتارىپ جۇرگەندەر 30 مىڭنان اسىپ وتىر

استانا. قازاقپارات – ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باعىت اعا وفيتسەرى رۋسلان تاپاشيەۆ مەرزىمدى اسكەري قىزمەتكە شاقىرتۋ ءۇشىن ىزدەستىرىلىپ جاتقان ادامدار جايىندا ايتتى، دەپ حابارلايدى قازاقپارات ءتىلشىسى.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا تىلشىلەر اسكەري بورىشىن وتەۋدەن جالتارىپ جۇرگەن جاستار تۋرالى سۇراق قويدى.

«بۇل تۇرعىدا قاشىپ جۇرگەن ەمەس، ىزدەستىرىلىپ جۇرگەن دەپ ناقتىلاعانىم دۇرىس بولار. وسى جىلى ىزدەستىرۋدە جۇرگەن ازاماتتاردىڭ سانى 30 مىڭنان اسىپ جىعىلادى. ال بىلتىر 37 مىڭنان استام بولدى»، - دەدى ر. تاپاشيەۆ.

وسى ورايدا ول جاستاردى اسكەرگە شاقىرۋ پۋنكتەرىنە جەتكىزۋ بويىنشا ءتيىستى جۇمىس جۇرگىزىلەتىنىن ايتتى.

«ولاردى ىزدەستىرۋگە ءتۇرلى سەبەپتەر اسەر ەتىپ وتىر. ولار جۇمىس بابىمەن تۇرعىلىقتى جەرىنەن كوشىپ كەتكەنىمەن اسكەري ەسەپتەن شىقپايدى. سوندىقتان ولاردى ىزدەستىرۋگە تۋرا كەلەدى. اتاپ ايتقاندا، ولار اسكەرگە شاقىرۋ پۋنكتەرىنە شاقىرۋ قاعازى بويىنشا كەلمەيدى. وسى ورايدا بۇل ادامداردىڭ ءتىزىمى جاسالىپ، ىزدەۋ جۇرگىزىلەدى. ولار - 18-27 جاس ارالىعىنداعى اسكەرگە شاقىرۋعا جاتاتىن جاستار»، - دەدى باس شتابتىڭ ۇيىمداستىرۋ-جۇمىلدىرۋ جۇمىستارى دەپارتامەنتىنىڭ اعا وفيتسەرى.