سالوننان كولىك الۋ ءۇشىن ونىڭ %30 الدىن الا تولەۋ - مينيستر ماسەلەنى انىقتاماق

None
استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ەلىمىزدە شىعارىلاتىن اۆتوكولىككە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بىلتىر 80 مىڭنان اسا كولىك شىعارساق، بيىل 11 ايدا 90 مىڭنان استام كولىك شىعارىلدى. نەگىزى، جىل اياعىنا دەيىن 110 مىڭ كولىككە جەتەدى. كەلەسى جىلى كورسەتكىشتى 135 مىڭعا دەيىن كوتەرەيىن دەپ وتىرمىز. الايدا بۇل كورسەتكىش ءالى دە ءوسۋى مۇمكىن. ويتكەنى حالىقتىڭ اراسىندا سۇرانىس وتە جوعارى. مەملەكەت باسشىسى الماتىعا جۇمىس ساپارى اياسىندا ءۇش زاۋىتتىڭ (Changan, Chery, Haval) ىرگەتاسىن قالاۋ راسىمىنە قاتىستى. وندا 3 مىقتى كومپانيانىڭ زاۋىتى اشىلادى دەگەن جوسپار بار. زاۋىتتار 1,5 -جىلدىڭ ىشىندە سالىنادى»، - دەدى ق. وسكەنبايەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.

سونىمەن قاتار تىلشىلەر مينيستردەن Hyundai مەن Kia كولىكتەرىن الۋ ءۇشىن اۆتوسالوندا كەزەككە تۇرۋ ماسەلەسى جايىندا سۇراق قويدى

«كەزەككە تۇرايىن دەسەڭ، ونىڭ %30 ىن الدىن الا تولەۋ كەرەك ەكەنسىڭ. مۇنى اۆتوسالوندار سوڭعى كەزدەرى وزدەرى شىعارىپ العان. بۇل تالاپ قانشالىقتى زاڭدى؟ اۆتوسالوندار سونداي تالاپ قويا الا ما؟»، - دەپ سۇرادى ءتىلشى.

ءوز كەزەگىندە ق. وسكەنبايەۆ بۇل ماسەلەگە قاتىستى مەملەكەتتىك ورگاندار تالقىلاۋ جۇرگىزەتىنىن ايتتى.

«ءسىز ايتىپ وتىرعان ماسەلەنى مەن دە ەستىدىم. قازىر جاڭا نوۋ- حاۋ دەيدى عوي، اۆتوسالوندار سونداي وزگەرىستەر ەنگىزىپ جاتىر. قازىر ءبىز مەملەكەتتىك باسقارۋ ورگاندارمەن مۇنىڭ كىمنىڭ قۇزىرەتىنە قارايتىتىنى اقىلداسامىز. كەيىن رەسمي تۇردە بۇل ماسەلەگە قاتىستى جاۋاپ بەرەمىز»، - دەدى ۆەدومستۆو باسشىسى.

بۇدان بۇرىن حابارلانعانداي، بيىل قاراشا ايىندا پرەزيدەنت قاسىم- جومارت توقايەۆ مۋلتيبرەندتى اۆتوموبيل زاۋىتىنىڭ ىرگەتاسىن قالاۋ راسىمىنە قاتىستى.

سوڭعى جاڭالىقتار