التاي كولگىنوۆ مەترو قۇرىلىسى تۋرالى: جەلتوقساندا 30 ميلليارد تەڭگە بولىنەدى
«LRT تۋرالى ايتساق، جۇمىس باستالىپ كەتتى. ءبىرىنشى ترانشتىڭ اقشاسى ءبولىندى. قازىر ينجەنەرلىك قۇراندى بولشەكتەرى مەن ارقالىقتارى ورناتىلىپ جاتقانىن كورىپ جۇرسىزدەر. قازىر وسىنىڭ ءبارى ءجۇرىپ جاتىر. ءبىزدىڭ مىندەت - LRT قۇرىلىسىن اياقتاۋ. كەلەسى جىلدىڭ بولجامى بويىنشا استانادا 1,5 ميلليون ادام تۇراتىن بولادى. بۇل جىل ءالى اياقتالعان جوق. تاعى 100 مىڭ ادام قوسىلاتىن شىعار. باس جوسپار بويىنشا 5-6 جىلدان كەيىن استانامىزدا 2 ميلليون ادام تۇرادى دەگەن بولجام بار»، - دەدى اكىم ق ر پرەزيدەنتىن ۇلىقتاۋ راسىمىنەن كەيىن باق وكىلدەرىنە بەرگەن سۇحباتىندا.
سونداي- اق، ول اتالعان قۇرىلىسقا ءالى 580 ميلليون دوللار كەرەك ەكەنىن ەسكە سالدى.
«قىتاي كونسورتسيۋمىمەن قازاقستان تاراپى اراسىندا مىندەتتەمەلەر مەن كەلىسىمدەرگە قول قويىلعان. ەندى قۇرىلىستى اياقتاۋ عانا قالدى. تاعى 580 ميلليون دوللار كەرەك. ءبىرىنشى ترانشپەن 20 ميلليارد تەڭگە بولىنگەن. ەكىنشى ترانش اياسىندا جەلتوقسان ايىندا 30 ميلليارد تەڭگە بولىنەدى. كەلىسىم قىتاي كونسورتسيۋمى مەن قازاقستان اراسىندا عانا جاسالعان. باسقا كەلىسىمدەر جوق. قازاقستان تاراپى تاپسىرىس بەرۋشى بولىپ وتىر»، - دەدى التاي كولگىنوۆ.
ايتا كەتەيىك، بۇگىن استاناداعى تاۋەلسىزدىك سارايىندا قازاقستان پرەزيدەنتىنىڭ ۇلىقتاۋ ءراسىمى ءوتتى.
اۆتور
ەسىمجان ناقتىباي