قازاقستاننىڭ ديپلوماتيالىق قىزمەتىنە - 30 جىل
2 شىلدە 10:03

قازاقستاننىڭ ديپلوماتيالىق قىزمەتىنە - 30 جىل

نۇر- سۇلتان. قازاقپارات - 2 -شىلدەدە قازاقستاندا ديپلوماتيالىق قىزمەت كۇنى اتالىپ وتەدى. بيىل قازاقستاننىڭ ديپلوماتيالىق قىزمەتىنە 30 جىل تولدى، دەپ حابارلايدى قازاقپارات ءتىلشىسى.

1992 -جىلى 2 - شىلدەدە تاۋەلسىز قازاقستاننىڭ سىرتقى ىستەر مينيسترلىگى قۇرىلعان ەدى. ءدال وسى كۇنى پرەزيدەنت نۇرسۇلتان نازاربايەۆتىڭ «ق ر سىرتقى ىستەر مينيسترلىگى تۋرالى»، «قازاقستان رەسپۋبليكاسىنىڭ ەلشىلىگى تۋرالى» جانە «ق ر توتەنشە جانە وكىلەتتى ەلشىسىنىڭ نەگىزگى مىندەتتەرى مەن قۇقىقتارى تۋرالى» ەرەجەلەردى بەكىتۋ تۋرالى جارلىعى شىقتى.

«ق ر پرەزيدەنتىنىڭ 1998 -جىلعى 20 -قاڭتارداعى «قازاقستان رەسپۋبليكاسىنداعى كاسىبي جانە وزگە دە مەرەكەلەر تۋرالى» №3827 جارلىعىنا تولىقتىرۋلار ەنگىزۋ تۋرالى» ق ر پرەزيدەنتىنىڭ 2009 -جىلعى 1 - شىلدەدەگى № 837 جارلىعىندا كاسىبي جانە وزگە دە مەرەكەلەر تىزبەسىنە 2 -شىلدە - ديپلوماتيالىق قىزمەت كۇنى دەپ تولىقتىرىلدى. بۇعان دەيىن مەملەكەت باسشىسى قاسىم- جومارت توقايەۆ ديپكورپۋس وكىلدەرىن ەلىمىزدىڭ ديپلوماتيالىق قىزمەتىنىڭ 30 جىلدىعىمەن قۇتتىقتاپ، بۇل مەرەيتويدىڭ جاڭا قازاقستان قۇرۋعا كىرىسكەن سىندارلى ساتپەن تۇسپا- تۇس كەلگەنىن ايتقان ەدى. پرەزيدەنتتىڭ ايتۋىنشا، ەلىمىز 186 ەلمەن قارىم- قاتىناس ورناتىپ، 50 حالىقارالىق ۇيىمنىڭ مۇشەسى بولدى.

«ءبىز وڭىرلىك جانە جاھاندىق پروتسەستەرگە بەلسەندى قاتىساتىن ورنىقتى ءارى بەدەلدى مەملەكەتكە اينالدىق. سىزدەر تاۋەلسىزدىگىمىزدىڭ العاشقى كۇنىنەن ەلىمىزدىڭ مۇددەسىن حالىقارالىق ارەنادا قورعاپ كەلەسىزدەر. قازىرگى گەوساياسي تۇراقسىزدىق جاعدايىندا سىزدەر جاھاندىق الەمدە قازاقستاننىڭ ۇستانىمىن نىعايتۋعا جانە شەت مەملەكەتتەرمەن ىنتىماقتاستىقتى دامىتۋعا ۇلكەن ۇلەس قوساسىزدار»، - دەدى قاسىم- جومارت توقايەۆ.

قازاقستاننىڭ سىرتقى ىستەر ءمينيسترى مۇحتار تىلەۋبەردى قازاقستان پوستكەڭەستىك كەڭىستىكتە العاشقىلاردىڭ ءبىرى بولىپ مەملەكەتتىك شەكارانى ونىڭ بۇكىل ۇزىندىعى بويىمەن رەسىمدەگەنىن جانە بۇگىندە كورشىلەس ەلدەردىڭ ەشقايسىسىمەن اۋماقتىق داۋى جوق ەكەنىن اتاپ ءوتتى. سونىمەن بىرگە مۇحتار تىلەۋبەردى ەلىمىزدىڭ سىرتقى ساياساتىنىڭ نەگىزگى باعىتتارىن اتادى .

ونىڭ ايتۋىنشا، سوڭعى جىلدارى تۇركى ەلدەرىنىڭ كووپەراتسيا ۇدەرىسى ايتارلىقتاي دامىپ كەلەدى. تۇركى كەڭەسى تۇركى مەملەكەتتەرىنىڭ تولىققاندى ۇيىمىنا اينالدىرىلىپ، «تۇركى كوزقاراسى- 2040» باعدارلاماسى قابىلداندى. تۇركىستاننىڭ 2021 -جىلى تۇركى الەمىنىڭ رۋحاني استاناسى بولىپ جاريالانۋىن - قازاقستاننىڭ تۇركى الەمىندەگى ءرولىن مويىنداۋ دەپ باعالاۋعا بولادى.

«بۇگىندە قازاقستان امەريكا قۇراما شتاتتارىمەن قارىم- قاتىناسىنىڭ جاڭا كەزەڭىن قالىپتاستىرىپ كەلەدى. ەۋروپالىق باعىتتا قازاقستان مەن ەو اراسىنداعى ءوزارا ءىس- قيمىل قولدانىستاعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدە جاسالعان ارتىقشىلىقتاردى بارىنشا پايدالانۋعا، ساۋدا جانە ينۆەستيتسيالىق ىنتىماقتاستىقتى نىعايتۋعا نەگىزدەلگەن. ۇلى بريتانيانىڭ ە و- دان شىعۋىنا بايلانىستى مينيسترلىكتىڭ الدىندا قازاقستان- بريتان قارىم- قاتىناسىن رەفورمالاۋ مىندەتى تۇر»، - دەيدى مينيستر.

ايتا كەتەيىك، بيىل قازاق ديپلوماتياسى ءۇشىن حالىقارالىق وقيعالار وتە كوپ. قىركۇيەك ايىندا قازاقستان 2003 -جىلدان بەرى وتكىزىلىپ كەلە جاتقان الەمدىك جانە ءداستۇرلى دىندەر ليدەرلەرىنىڭ 7-سەزىن قابىلداۋعا دايىندالۋدا. ال قازان ايىندا نۇر- سۇلتان قالاسىندا وتەتىن، قازاقستاندىق باستامانىڭ 30 جىلدىعىنا ورايلاستىرىلعان ازياداعى ءوزارا ءىس- قيمىل جانە سەنىم شارالارى كەڭەسىنىڭ 6- سامميتىنە دايىندىق ءجۇرىپ جاتىر. سونداي- اق قازاقستان ب ۇ ۇ- نىڭ ادام قۇقىقتارى جونىندەگى كەڭەسىنىڭ جۇمىسىنا قاتىسادى.

جاڭالىقتار